ઉજ્જૈન:ટેલિવિઝનનો લોકપ્રિય ક્વિઝ શો ‘કૌન બનેગા કરોડપતિ’ (KBC) અને તેના હોસ્ટ અમિતાભ બચ્ચન કાયદાકીય મુશ્કેલીમાં ફસાયા છે. ૨૩ ડિસેમ્બર, ૨૦૨૫ના રોજ પ્રસારિત થયેલા એક એપિસોડ દરમિયાન ઉજ્જૈન જિલ્લાના નાગડા શહેર વિશે કરવામાં આવેલી એક ટિપ્પણીએ મોટો વિવાદ છેડ્યો છે. આ એપિસોડમાં નાગડાને 'પાણીના સંકટનો સામનો કરી રહેલા એક નાના ગામ' તરીકે વર્ણવવામાં આવ્યું હતું. આ વાતથી નાગડાના રહીશો અને સ્થાનિક વકીલોમાં ભારે રોષ જોવા મળી રહ્યો છે.

સ્થાનિકોનું કહેવું છે કે, નાગડા એ કોઈ નાનું ગામ નથી પણ દોઢ લાખથી વધુ વસ્તી ધરાવતું માલવા પ્રદેશનું એક મોટું ઔદ્યોગિક કેન્દ્ર અને મહત્વનું રેલ્વે જંકશન છે. ચંબલ નદીના કિનારે વસેલા આ શહેરને 'પાણી વગરનું ગામ' કહેવું એ હકીકતની દૃષ્ટિએ ખોટું છે અને શહેરની પ્રતિષ્ઠાને કલંકિત કરવા સમાન છે. આ મામલે એડવોકેટ લક્ષ્મણ સુંદ્રાએ અમિતાભ બચ્ચન અને સોની નેટવર્કના સીઈઓ ગૌરવ બેનર્જી વિરુદ્ધ કોર્ટમાં ફરિયાદ કરી છે.

નાગડાની જેએમએફસી (JMFC) કોર્ટે આ ફરિયાદને ગંભીરતાથી સ્વીકારી છે અને કેસ ઇન્ફર્મેશન સિસ્ટમ (CIS) માં તેની નોંધણી કરવાના આદેશ આપ્યા છે. કોર્ટે સંબંધિત પોલીસ સ્ટેશનને આ મામલે તપાસ કરીને રિપોર્ટ રજૂ કરવા પણ નિર્દેશ આપ્યો છે. હવે આ કેસની આગામી સુનાવણી ૯ એપ્રિલ, ૨૦૨૬ ના રોજ નક્કી કરવામાં આવી છે. એક સમયે જિલ્લાનો દરજ્જો મેળવવાની રેસમાં રહેલા નાગડા શહેરના લોકો માટે આ સ્વાભિમાનની લડાઈ બની ગઈ છે.