ટોક્યો:: ટેકનોલોજી અને નવીનતાના પર્યાય સમાન જાપાને શૈક્ષણિક ક્ષેત્રે એક મોટી સિદ્ધિ હાંસલ કરી છે. જાપાન સરકારે વર્ષ ૨૦૩૩ સુધીમાં ૪ લાખ આંતરરાષ્ટ્રીય વિદ્યાર્થીઓને આકર્ષવાનું લક્ષ્ય રાખ્યું હતું, પરંતુ નવાઈની વાત એ છે કે નિર્ધારિત સમય કરતાં ૮ વર્ષ વહેલા એટલે કે જૂન ૨૦૨૫ સુધીમાં જ વિદ્યાર્થીઓની સંખ્યા ૪,૩૫,૨૦૦ પર પહોંચી ગઈ છે. આંકડાઓ દર્શાવે છે કે ૨૦૨૪ની સરખામણીમાં વિદેશી વિદ્યાર્થીઓમાં ૮.૨% નો નોંધપાત્ર વધારો થયો છે.
કેમ જાપાન વિદેશી વિદ્યાર્થીઓને આવકારી રહ્યું છે?
જાપાન હાલમાં ઘટતી જતી વસ્તી અને શ્રમની અછતનો સામનો કરી રહ્યું છે. દેશના અર્થતંત્રને વેગ આપવા માટે જાપાન સરકાર આંતરરાષ્ટ્રીય વિદ્યાર્થીઓને 'ઉચ્ચ કુશળ પ્રતિભા' તરીકે જોઈ રહી છે. જાપાનમાં અત્યારે અંદાજે ૮.૬૬ લાખ વિદેશી કામદારો ઉચ્ચ કુશળ શ્રેણીમાં કામ કરે છે, જે સંખ્યા છેલ્લા દાયકામાં ૫ ગણી વધી છે. જાપાન ઈચ્છે છે કે આ વિદ્યાર્થીઓ અભ્યાસ પૂર્ણ કર્યા બાદ ત્યાંના કાર્યબળમાં જોડાય.
ત્રણ મોટી યુનિવર્સિટીઓને મળી ખાસ મંજૂરી
જાપાનના શિક્ષણ મંત્રાલયે એક ઐતિહાસિક નિર્ણય લેતા તોહોકુ યુનિવર્સિટી, હિરોશિમા યુનિવર્સિટી અને ત્સુકુબા યુનિવર્સિટીને ૨૦૨૬ના શૈક્ષણિક સત્રથી નિર્ધારિત ક્વોટા કરતાં વધુ આંતરરાષ્ટ્રીય વિદ્યાર્થીઓને પ્રવેશ આપવાની છૂટ આપી છે. આ સાથે જ યુનિવર્સિટીઓને તેમની સુવિધાઓ વધારવા માટે ટ્યુશન ફીમાં પણ ફેરફાર કરવાની સ્વાયત્તતા અપાઈ છે.
અંગ્રેજી માધ્યમ અને ફીમાં ફેરફાર
જાપાની ભાષા શીખવી વિદેશીઓ માટે અઘરી હોવાથી, હવે જાપાનની યુનિવર્સિટીઓ વધુને વધુ અંગ્રેજી-માધ્યમ (English-Medium) અભ્યાસક્રમો શરૂ કરી રહી છે. ફીની વાત કરીએ તો, ૨૦૨૭ થી તોહોકુ યુનિવર્સિટી વાર્ષિક ટ્યુશન ફી વધારીને ૯,૦૦,૦૦૦ યેન (અંદાજે ૫ લાખ રૂપિયાથી વધુ) કરશે. જોકે, અમેરિકા કે બ્રિટન જેવા દેશોની સરખામણીમાં જાપાનમાં ભણવું હજુ પણ ઘણું સસ્તું છે.
ભાષા અને કાયમી વસવાટ માટે નવા નિયમો
વધતી જતી વિદેશી વસ્તીને ધ્યાનમાં રાખીને વડાપ્રધાન સના તાકાઈચીની સરકારે જાન્યુઆરી ૨૦૨૬ માં જાહેરાત કરી છે કે વિદ્યાર્થીઓ માટે ભાષાકીય સહાય મજબૂત કરવામાં આવશે. જોકે, સામાજિક એકીકરણ જાળવવા માટે કાયમી રહેઠાણ (PR) મેળવવા માટેના જરૂરી સમયગાળામાં પણ ફેરફાર કરવામાં આવી શકે છે.
જાપાનનું આ શૈક્ષણિક પરિવર્તન ભારતીય વિદ્યાર્થીઓ માટે વિજ્ઞાન, એન્જિનિયરિંગ અને આઈટી ક્ષેત્રે કારકિર્દી બનાવવા માટેની સુવર્ણ તક લઈને આવ્યું છે.