ગુવાહાટી:આસામ વિધાનસભા ચૂંટણીની સત્તાવાર જાહેરાત ભલે હજુ બાકી હોય, પરંતુ પૂર્વોત્તરના આ પ્રવેશદ્વાર પર સત્તાનો સંગ્રામ અત્યારથી જ જામ્યો છે. ભાજપ સતત ત્રીજી વખત સત્તા કબજે કરવા (હેટ્રિક) માટે મરણિયું થયું છે, ત્યારે બીજી તરફ કોંગ્રેસ પોતાના ૧૦ વર્ષના રાજકીય વનવાસને ખતમ કરવા એડીચોટીનું જોર લગાવી રહી છે. આ જંગમાં કોંગ્રેસને ઉગારવા માટે મહાસચિવ પ્રિયંકા ગાંધીએ મોરચો સંભાળ્યો છે અને તેની શરૂઆત અત્યંત વ્યૂહાત્મક રીતે કરી છે.
 પ્રિયંકા ગાંધીએ પોતાના આસામ પ્રવાસની શરૂઆત નીલાંચલ પહાડી પર સ્થિત વિશ્વપ્રસિદ્ધ શક્તિપીઠ મા કામાખ્યા દેવીના દર્શન અને પૂજા-અર્ચના સાથે કરી હતી. લાલ વસ્ત્રોમાં સજ્જ પ્રિયંકાએ મંદિરમાં માથું ટેકવીને આશીર્વાદ લીધા હતા. રાજકીય વિશ્લેષકો માને છે કે, ભાજપના 'હિન્દુત્વ'ના એજન્ડા સામે કોંગ્રેસે આ 'સોફ્ટ હિન્દુત્વ' અને 'મંદિર દાવ' દ્વારા વળતો પ્રહાર કરવાનો પ્રયાસ કર્યો છે.
 આસામમાં હિમંતા બિસ્વા સરમાના નેતૃત્વમાં ભાજપે એવો મજબૂત ચક્રવ્યૂહ રચ્યો છે જેમાં કોંગ્રેસ અત્યાર સુધી ઉલઝેલી જોવા મળી છે. સીમા વિવાદ, NRC-CAA અને કટ્ટર હિન્દુત્વ જેવા મુદ્દાઓ પર ભાજપની પકડ મજબૂત છે. બીજી તરફ, કોંગ્રેસ અંદરખાને જૂથવાદ અને નબળા સંગઠનથી પીડાઈ રહી છે. પ્રિયંકા ગાંધીનો આ પ્રવાસ કાર્યકરોમાં નવો ઉત્સાહ ભરવા અને મહિલા મતદારોને આકર્ષવા માટેનો એક મોટો પ્રયાસ માનવામાં આવે છે.
પ્રિયંકા ગાંધીએ જે રીતે પોતાની સફરની શરૂઆત ભક્તિભાવ સાથે કરી છે, તે સ્પષ્ટ સંકેત આપે છે કે કોંગ્રેસ હવે ભાજપને ધર્મના મુદ્દે ખુલ્લું મેદાન આપવા માંગતી નથી. જોકે, સવાલ એ છે કે શું આ પ્રયોગ માત્ર પ્રતીકાત્મક બની રહેશે કે પછી આસામના મતદારોના દિલ જીતવામાં સફળ થશે? ભાજપે પણ પોતાના સ્ટાર પ્રચારકોને મેદાનમાં ઉતારી દીધા છે, જેનાથી આસામનો ચૂંટણી જંગ વધુ રસપ્રદ બન્યો છે. આસામના ખૂણેખૂણે અત્યારે રાજકીય ગરમાવો છે અને પ્રિયંકા ગાંધીના આ 'શક્તિ પ્રદર્શન' બાદ આગામી દિવસોમાં ભાજપ અને કોંગ્રેસ વચ્ચે શાબ્દિક યુદ્ધ વધુ તેજ બને તેવી પૂરેપૂરી શક્યતા છે