ધમતરી : છત્તીસગઢના ધમતરી જિલ્લામાંથી એક અત્યંત વિચલિત કરનારી ઘટના સામે આવી છે. અહીંના કુરુડ બ્લોકમાં આવેલી દહદહા ગામની સરકારી માધ્યમિક શાળાના ૩૫ જેટલા વિદ્યાર્થીઓએ અગમ્ય કારણોસર પોતાના કાંડા કાપી નાખ્યા છે. એક સાથે આટલી મોટી સંખ્યામાં બાળકોએ આવું જીવલેણ પગલું ભરતા શાળા પ્રશાસન અને વાલીઓમાં ભારે ફફડાટ વ્યાપી ગયો છે.
ઘટનાના ૨૦ દિવસ બાદ થયો પર્દાફાશ
આ આશ્ચર્યજનક મામલો અંદાજે ૨૦ દિવસ જૂનો હોવાનું કહેવાય છે. બાળકોના હાથ પર કાપના નિશાન જોઈને જ્યારે વાલીઓએ પૂછપરછ કરી ત્યારે આ ભયાનક સત્ય બહાર આવ્યું હતું. ત્યારબાદ ગ્રામ પંચાયતમાં આ મુદ્દો ઉઠાવવામાં આવ્યો અને વહીવટી તંત્રને જાણ કરવામાં આવી હતી. તપાસ ટીમ જ્યારે શાળાએ પહોંચી ત્યારે જાણવા મળ્યું કે બાળકોએ એકબીજાની જોખમી નકલ કરીને અથવા કોઈ અજાણ્યા પ્રભાવ હેઠળ આ કૃત્ય કર્યું છે.
શું કોઈ ગેમ કે અંધશ્રદ્ધા જવાબદાર?
શાળા મેનેજમેન્ટ અને પંચાયતના પ્રતિનિધિઓનું પ્રાથમિક અનુમાન છે કે બાળકોએ 'પીઅર પ્રેશર' અથવા એકબીજાને જોઈને આવું કર્યું હોઈ શકે છે. જોકે, ગ્રામજનોમાં એવી પણ ચર્ચા છે કે આ કોઈ સોશિયલ મીડિયા ચેલેન્જ અથવા અન્ય કોઈ માનસિક દબાણનું પરિણામ હોઈ શકે છે. હાલમાં શિક્ષણ વિભાગની ટીમ અને કાઉન્સેલરો બાળકો સાથે વાતચીત કરીને તેમનું મનોવૈજ્ઞાનિક વિશ્લેષણ કરી રહ્યા છે.
ABVP ની આંદોલનની ચેતવણી
આ ઘટનાના ઘેરા પ્રત્યાઘાત પડ્યા છે. અખિલ ભારતીય વિદ્યાર્થી પરિષદ (ABVP) ના કાર્યકરોએ બુધવારે જિલ્લા શિક્ષણ અધિકારી (DEO) ની ઓફિસે પહોંચીને હંગામો મચાવ્યો હતો. તેમણે આ મામલે સ્પેશિયલ કમિટી બનાવીને તટસ્થ તપાસ કરવાની માંગ કરી છે. ABVP એ સ્પષ્ટ શબ્દોમાં ચેતવણી આપી છે કે જો ટૂંક સમયમાં સત્ય બહાર નહીં આવે અને જવાબદારો સામે કાર્યવાહી નહીં થાય, તો તેઓ ઉગ્ર આંદોલન કરશે.
હાલમાં આરોગ્ય વિભાગની ટીમ દ્વારા બાળકોના સ્વાસ્થ્યની તપાસ કરવામાં આવી રહી છે અને સમગ્ર વિસ્તારમાં આ ઘટના ચર્ચાનો વિષય બની છે.