ઇસ્લામાબાદ: પાકિસ્તાન અને અફઘાનિસ્તાન વચ્ચેના સંબંધો અત્યારે બારુદના ઢગલા પર આવીને ઊભા છે. ખૈબર પખ્તુનખ્વાના બાજૌર વિસ્તારમાં થયેલા ભીષણ આત્મઘાતી હુમલામાં ૧૧ પાકિસ્તાની સૈનિકોના લોહી વહેતા હવે ઇસ્લામાબાદે સંયમ ગુમાવ્યો છે. પાકિસ્તાનના વિદેશ મંત્રાલયે અફઘાન મિશનના ડેપ્યુટી હેડને તેડું મોકલીને અત્યંત કડક શબ્દોમાં 'ડિમાર્ચ' (ઔપચારિક ચેતવણી) પાઠવી છે. પાકિસ્તાને ખુલ્લેઆમ જાહેર કર્યું છે કે જો તાલિબાન સરકાર TTP ના આતંકવાદીઓ પર લગામ નહીં કસે, તો પાકિસ્તાની સેના અફઘાનિસ્તાનની સરહદમાં ઘૂસીને આતંકી ઠેકાણાઓનો નાશ કરતા અચકાશે નહીં.

વિદેશ મંત્રાલય દ્વારા જારી કરાયેલા આ સત્તાવાર સંદેશમાં સ્પષ્ટપણે જણાવાયું છે કે પાકિસ્તાની સૈનિકો અને નાગરિકોના રક્ષણ માટે તેઓ "ગમે ત્યાં" હુમલો કરવાનો અધિકાર અનામત રાખે છે. પાકિસ્તાનનો સીધો આરોપ છે કે 'ફિત્ના અલ-ખ્વારીજ' (TTP) ના નેતાઓ અફઘાનિસ્તાનની ધરતી પર આશ્રય મેળવીને પાકિસ્તાન વિરુદ્ધ લોહિયાળ કાવતરાં ઘડી રહ્યા છે. વારંવારની ખાતરીઓ છતાં તાલિબાન સરકાર કોઈ નક્કર કાર્યવાહી કરી રહી નથી, જેના કારણે હવે પાકિસ્તાન સીધા સૈન્ય હુમલાની તૈયારી કરી રહ્યું હોય તેવું લાગી રહ્યું છે. ૧૧ સૈનિકોની શહાદતે પાકિસ્તાની સેનામાં ભારે આક્રોશ જન્માવ્યો છે, જે હવે ગમે ત્યારે સરહદ પારના ઓપરેશનમાં પરિણમી શકે છે.

બીજી તરફ, અફઘાન તાલિબાને પાકિસ્તાનના આ આરોપોને કચરાપેટીમાં નાખી દીધા છે. તાલિબાનનું કહેવું છે કે પાકિસ્તાને પોતાની સુરક્ષામાં રહેલી ખામીઓ માટે બીજા પર દોષારોપણ કરવાનું બંધ કરવું જોઈએ. જોકે, પાકિસ્તાને જે રીતે રાજદ્વારી વાણીનો ત્યાગ કરીને "જ્યાં પણ હોય ત્યાં ખતમ કરવાનો અધિકાર" જેવી ભાષા વાપરી છે, તે સૂચવે છે કે દક્ષિણ એશિયામાં વધુ એક મોટો લશ્કરી સંઘર્ષ તોળાઈ રહ્યો છે. જો પાકિસ્તાન અફઘાનિસ્તાન પર હવાઈ હુમલા કે સર્જિકલ સ્ટ્રાઈક કરે છે, તો તાલિબાન પણ વળતો પ્રહાર કરવાની તૈયારીમાં છે, જેનાથી સમગ્ર વિસ્તારમાં અસ્થિરતા વ્યાપી શકે છે.