મિર્ઝાપુર:ઉત્તર પ્રદેશના મિર્ઝાપુર જિલ્લામાં એક એવી ઘટના સામે આવી છે જેણે સૌને સ્તબ્ધ કરી દીધા છે. એક ગરીબ મજૂર, જે માંડ માંડ પોતાનું ગુજરાન ચલાવે છે, તેને ઇન્કમ ટેક્સ વિભાગ તરફથી રૂ. ૧૭.૪ કરોડની નોટિસ ફટકારવામાં આવી છે. અધિકારીઓની ટીમ જ્યારે અચાનક તેના ઘરે પહોંચી અને કરોડોના વ્યવહારનો હિસાબ માંગ્યો, ત્યારે આ મજૂરના પગ નીચેથી જમીન સરકી ગઈ હતી.
 પીડિત શિવધાની ઘોરવાલના જણાવ્યા અનુસાર, તે સોનભદ્રમાં એક બેટરીની દુકાનમાં મજૂરી કરતો હતો. તેના માલિકે 'પગાર સીધો ખાતામાં જમા થશે' તેવું વચન આપીને શિવધાનીના નામે બેંકોમાં ખાતા ખોલાવ્યા હતા. નિર્દોષ મજૂરે માલિક પર વિશ્વાસ મૂકીને કાગળો પર સહી કરી આપી હતી. જોકે, થોડા સમય બાદ માલિકે મંદીનું બહાનું કાઢીને તેને નોકરીમાંથી કાઢી મૂક્યો હતો. શિવધાનીને અંદાજો પણ નહોતો કે તેના માલિકે તેના ખાતાનો ઉપયોગ કરોડો રૂપિયાના કાળા નાણાં ફેરવવા માટે કર્યો છે.
આવકવેરા વિભાગની ટીમે જ્યારે શિવધાનીના માટીના ઘરની મુલાકાત લીધી, ત્યારે તેમને પણ આશ્ચર્ય થયું હતું. રૂ. ૧૭૪ મિલિયન (૧૭.૪ કરોડ) થી વધુની નોટિસ અંગે જ્યારે પૂછપરછ કરવામાં આવી, ત્યારે સત્ય બહાર આવ્યું કે મજૂરના નામે બેંક વ્યવહારો દ્વારા મોટી ટેક્સ ચોરી કરવામાં આવી છે. શિવધાનીએ જણાવ્યું કે અધિકારીઓએ તેને આ બાબતે કોઈને જાણ ન કરવા ધમકી પણ આપી હતી, પરંતુ ડરી ગયેલો મજૂર ન્યાય માટે પોલીસ અધિક્ષકની ઓફિસે પહોંચ્યો છે.
પીડિત શિવધાની પાસે પોતાની કોઈ જમીન નથી અને તે દર મહિને માત્ર ૮,૦૦૦ રૂપિયા કમાઈને મુંબઈમાં ગુજરાન ચલાવી રહ્યો હતો. હવે જ્યારે તેના પર કરોડોનું દેવું આવી પડ્યું છે, ત્યારે તેનો ભૂતપૂર્વ માલિક મદદ કરવાને બદલે હાથ ઊંચા કરી રહ્યો છે. પોલીસે હાલમાં આ મામલે મેમોરેન્ડમ સ્વીકારીને તપાસ શરૂ કરી છે. આ ઘટનાએ ફરી એકવાર સાબિત કર્યું છે કે કેવી રીતે અબજોપતિઓ ગરીબ લોકોના દસ્તાવેજોનો ઉપયોગ કરીને કાયદાની આંખમાં ધૂળ નાખે છે.
હવે જોવાનું એ રહેશે કે પોલીસ આ કૌભાંડના અસલી માસ્ટરમાઇન્ડ સુધી ક્યારે પહોંચે છે અને નિર્દોષ મજૂરને આ આર્થિક બોજમાંથી મુક્તિ મળે છે કે નહીં.