તરનતારન: તા. ૯: પંજાબના તરનતારન જિલ્લામાંથી એક અત્યંત ચોંકાવનારી અને હૃદય ધ્રુજાવી દે તેવી ઘટના સામે આવી છે. અહીંની એક ખાનગી લો (Law) કોલેજમાં અભ્યાસ કરતા પ્રથમ વર્ષના વિદ્યાર્થીએ તેની જ સાથે ભણતી સહાધ્યાયી યુવતીની નિર્મમ હત્યા કરી નાખી છે. આટલું જ નહીં, યુવતી પર ગોળીબાર કર્યા બાદ તરત જ યુવકે તે જ પિસ્તોલ વડે પોતાને પણ ગોળી મારી આત્મહત્યાનો પ્રયાસ કર્યો હતો. આ ઘટનાને પગલે આખા કેમ્પસમાં અફરાતફરી અને ભયનો માહોલ વ્યાપી ગયો હતો.
લેક્ચર શરૂ થવાની ગણતરીની મિનિટો પહેલા જ ખેલાયો ખૂની ખેલ
મળતી માહિતી મુજબ, આરોપી વિદ્યાર્થી પ્રિન્સ રાજ, જે ઉસ્મા ગામની કોલેજમાં કાયદાનો અભ્યાસ કરતો હતો, તે સોમવારે સવારે ક્લાસરૂમમાં લેક્ચર શરૂ થાય તે પહેલાં જ પહોંચી ગયો હતો. કોઈ કંઈ સમજે તે પહેલા જ તેણે પિસ્તોલ કાઢીને તેની સાથે ભણતી સંદીપ કૌર પર નિશાન સાધ્યું હતું. સંદીપ કૌરના માથાના ભાગે ગોળી વાગતા તે લોહીલુહાણ હાલતમાં ત્યાં જ ઢળી પડી હતી અને તેનું ઘટનાસ્થળે જ કમકમાટીભર્યું મોત નીપજ્યું હતું.
હત્યા બાદ વિદ્યાર્થીએ પોતાની ઉપર પણ ગોળી ચલાવી
વર્ગખંડમાં અન્ય વિદ્યાર્થીઓની હાજરી વચ્ચે સંદીપની હત્યા કર્યા બાદ, પ્રિન્સ રાજે ક્ષણભરનો પણ વિલંબ કર્યા વગર પિસ્તોલ પોતાના પર તાકી હતી અને ટ્રિગર દબાવી દીધું હતું. ગોળીબારના અવાજથી આખી કોલેજ ગુંજી ઉઠી હતી. ગંભીર રીતે ઘવાયેલા પ્રિન્સને તાત્કાલિક હોસ્પિટલ ખસેડવામાં આવ્યો છે, જ્યાં તેની હાલત અત્યંત નાજુક હોવાનું કહેવાય છે.
સીસીટીવી ફૂટેજમાં કેદ થઈ ભયાનક ઘટના
ઘટનાની જાણ થતા જ પોલીસના ઉચ્ચ અધિકારીઓ કાફલા સાથે ઘટનાસ્થળે દોડી આવ્યા હતા. પોલીસને ક્લાસરૂમના સીસીટીવી ફૂટેજ મળ્યા છે, જેમાં સ્પષ્ટ જોઈ શકાય છે કે કેવી રીતે પ્રિન્સ રાજ ડેસ્ક પાસે ઉભો રહીને અચાનક ગોળીબાર કરે છે. આ દ્રશ્યો જોઈને અન્ય વિદ્યાર્થીઓ જીવ બચાવવા માટે વર્ગખંડની બહાર દોડતા દેખાય છે. પોલીસે ઘટનાસ્થળેથી હત્યામાં વપરાયેલ હથિયાર જપ્ત કર્યું છે.
તપાસના ઘેરામાં અનેક સવાલો
ડીએસપી જગબીર સિંહે જણાવ્યું હતું કે, આ આત્મઘાતી હુમલા પાછળનો ચોક્કસ હેતુ હજુ સ્પષ્ટ થયો નથી. શું આ એકતરફી પ્રેમનો કિસ્સો છે કે પછી બંને વચ્ચે કોઈ જૂની દુશ્મની હતી, તે દિશામાં ફોરેન્સિક ટીમો અને પોલીસ તપાસ કરી રહી છે. કોલેજમાં હથિયાર કેવી રીતે આવ્યું અને પ્રિન્સ પાસે પિસ્તોલ ક્યાંથી આવી, તે પણ એક મોટો તપાસનો વિષય બન્યો છે.