લખનૌ: ઉત્તર પ્રદેશમાં ચાઈનીઝ માંજાના કારણે સતત થતા અકસ્માતો અને નિર્દોષ લોકોના મોતે મુખ્યમંત્રી યોગી આદિત્યનાથને રોષે ભરાવ્યા છે. સીએમ યોગીએ અત્યંત કડક વલણ અપનાવતા જાહેરાત કરી છે કે, હવેથી ચાઈનીઝ માંજાને કારણે થતા કોઈપણ મૃત્યુને અકસ્માત નહીં પરંતુ 'હત્યા' ગણવામાં આવશે અને તે મુજબ જ કાયદાકીય કાર્યવાહી કરવામાં આવશે.

મુખ્યમંત્રીએ પોલીસ વડાઓને આદેશ આપ્યો છે કે પ્રતિબંધ હોવા છતાં આ જીવલેણ માંજો બજારમાં કેવી રીતે પહોંચે છે તેની ઉચ્ચ સ્તરીય તપાસ કરવામાં આવે. તેમણે સમગ્ર રાજ્યમાં સઘન દરોડા પાડીને ચાઈનીઝ માંજાનું વેચાણ અને સંગ્રહ કરનારાઓ સામે રાજ્યવ્યાપી ઝુંબેશ શરૂ કરવાનો નિર્દેશ આપ્યો છે.
તાજેતરમાં લખનૌના દુબગ્ગા વિસ્તારમાં 33 વર્ષીય મોહમ્મદ શોએબનું ચાઈનીઝ માંજાથી ગળું કપાઈ જવાથી કરુણ મોત નીપજ્યું હતું. આ ઘટના બાદ જૌનપુર, મેરઠ અને અલીગઢ સહિતના અનેક શહેરોમાંથી માંજાથી ઘાયલ થવાના કિસ્સાઓ પ્રકાશમાં આવ્યા છે. 2025 માં પણ એક કોન્સ્ટેબલ સહિત અનેક લોકોએ આ ખૂની દોરાને કારણે જીવ ગુમાવ્યા હતા. મકરસંક્રાંતિ દરમિયાન પણ દેશભરમાં અનેક પક્ષીઓ અને રાહદારીઓ આ માંજાનો શિકાર બન્યા હતા.
ચાઈનીઝ માંજો પરંપરાગત સુતરાઉ દોરાથી તદ્દન અલગ અને વધુ જીવલેણ હોય છે. તેને બનાવવા માટે નાયલોન અને પોલિએસ્ટર જેવા સિન્થેટિક પદાર્થોનો ઉપયોગ થાય છે. તેની ધાર વધારવા માટે તેના પર બારીક કાચ, એલ્યુમિનિયમ પાઉડર અને ટંગસ્ટન કાર્બાઈડ જેવા ધાતુના કણોનું પડ ચડાવવામાં આવે છે. આ મિશ્રણ તેને લોખંડના તાર જેવું મજબૂત અને બ્લેડ જેવું તીક્ષ્ણ બનાવે છે, જે ગળાની નસ કાપવા માટે પૂરતું છે.
યોગી સરકારના નવા કડક નિયમો:
કડક કલમો: ચાઈનીઝ માંજાના કેસમાં હવે કલમ 302 (હત્યા) હેઠળ ગુનો નોંધી શકાશે.
જવાબદારી નક્કી: સ્થાનિક પોલીસ સ્ટેશનના ઈન્ચાર્જની જવાબદારી રહેશે કે તેમના વિસ્તારમાં માંજો ન વેચાય.
ઉચ્ચ સ્તરીય સમીક્ષા: માંજાના સપ્લાય ચેઈનને તોડવા માટે એસટીએફ (STF) ને પણ કામે લગાડવામાં આવી શકે છે.