એરિઝોના :  અમેરિકાના એરિઝોના રાજ્યમાં એક ભયાનક દુર્ઘટના ઘટી છે, જેમાં પબ્લિક સેફ્ટી વિભાગનું એક 'રેન્જર' હેલિકોપ્ટર ઓપરેશન દરમિયાન ક્રેશ થઈ ગયું છે. આ અકસ્માત ત્યારે થયો જ્યારે ફ્લેગસ્ટાફ વિસ્તારમાં સક્રિય ગોળીબાર ની સ્થિતિ હતી અને હેલિકોપ્ટર ક્રૂ સ્થાનિક પોલીસને હવાઈ સુરક્ષા પૂરી પાડવા માટે આકાશમાં તૈનાત હતું. કમનસીબે, ગ્રાઉન્ડ પર ચાલી રહેલા સંઘર્ષ વચ્ચે હેલિકોપ્ટર પરથી નિયંત્રણ ગુમાવ્યું અને તે પછડાતા પાયલટ અને તેમાં સવાર એક પોલીસ ઓફિસર/પેરામેડિકનું ઘટનાસ્થળે જ કરૂણ મોત નીપજ્યું હતું. આ ઘટનાએ આખા રાજ્યના પોલીસ બેડામાં શોકની લહેર ફેલાવી દીધી છે.

વિભાગના સાર્જન્ટ કેમેરોન લીએ ભારે હૈયે આ ઘટનાની પુષ્ટિ કરતા જણાવ્યું કે, આ અકસ્માત અત્યંત દુઃખદ છે કારણ કે બંને જવાનો અન્ય લોકોના જીવ બચાવવાના મિશન પર હતા. હાલમાં પાયલટ અને ઓફિસરના નામ ગુપ્ત રાખવામાં આવ્યા છે જેથી તેમના પરિવારોને આઘાત સહન કરવાની શક્તિ મળે અને જરૂરી પ્રક્રિયાઓ પૂર્ણ કરી શકાય. ફેડરલ એવિએશન એડમિનિસ્ટ્રેશન  અને નેશનલ ટ્રાન્સપોર્ટેશન સેફ્ટી બોર્ડ l એ આ મામલે તપાસના ચક્રો ગતિમાન કર્યા છે. શું હેલિકોપ્ટર કોઈ ટેકનિકલ ખામીને કારણે પડ્યું કે પછી નીચેથી થઈ રહેલા ગોળીબારનો શિકાર બન્યું, તે તપાસનો વિષય છે.

આ દુર્ઘટના એરિઝોનાના એર રેસ્ક્યુ યુનિટ માટે એક અસહ્ય ફટકો સમાન છે. આ યુનિટ સામાન્ય રીતે અત્યંત જોખમી અને જટિલ પરિસ્થિતિઓમાં કાર્ય કરવા માટે જાણીતું છે, જેમાં પહાડી વિસ્તારોમાં બચાવ કાર્યથી લઈને ઉચ્ચ જોખમ ધરાવતી શોધ કામગીરીનો સમાવેશ થાય છે. જે યુનિટ હંમેશા મજબૂત દીવાલ બનીને નાગરિકોની સુરક્ષા કરતું હતું, તેના જ બે બાહોશ જવાનોના મોતે સુરક્ષા એજન્સીઓની સુરક્ષા સામે પણ પ્રશ્નો ઉભા કર્યા છે. હાલમાં ઘટનાસ્થળને સીલ કરી દેવામાં આવ્યું છે અને વધુ વિગતોની રાહ જોવાઈ રહી છે.