મુંબઈ:  T20 વર્લ્ડ કપના શ્રીગણેશ થાય તે પહેલા જ ભારત અને પાકિસ્તાન વચ્ચે મેદાન બહારનું રાજકારણ ગરમાયું છે. ICC દ્વારા યોજાયેલી તમામ 20 કેપ્ટનોની બેઠકમાં જ્યારે પાકિસ્તાન સામેની મેચ અંગે સવાલ પૂછવામાં આવ્યો, ત્યારે ભારતીય કેપ્ટન સૂર્યકુમાર યાદવે પોતાની આગવી સ્ટાઈલમાં ફટકાબાજી કરી હતી. સૂર્યાએ સ્પષ્ટપણે જણાવ્યું કે ભારતે ક્યારેય પાકિસ્તાન સામે રમવાની ના પાડી નથી, ઉલટાનું પાકિસ્તાન જ બહાના બનાવીને પીછેહઠ કરી રહ્યું છે. તેમણે આત્મવિશ્વાસ સાથે કહ્યું, "અમારી ફ્લાઈટ બુક થઈ ગઈ છે અને અમે કોલંબો જઈ રહ્યા છીએ. જો મેચ ફિક્સ છે, તો અમે મેદાનમાં ઉતરવા માટે પૂરી રીતે સજ્જ છીએ."

આ વિવાદ પાછળનું મુખ્ય કારણ પાકિસ્તાન સરકારનો એ નિર્ણય છે જેમાં તેમણે સુરક્ષા અને બાંગ્લાદેશ સાથે એકતા દર્શાવવાના નામે પોતાની ટીમને કોલંબોમાં ભારત સામે રમવાની મંજૂરી આપી નથી. સૂર્યકુમારે આ અંગે કટાક્ષ કરતા કહ્યું કે પાકિસ્તાનનો નિર્ણય લેવો તેમના હાથમાં નથી, પણ ભારત હંમેશા શ્રેષ્ઠ ક્રિકેટ રમવા માટે ઉત્સુક છે. તેમણે એશિયા કપના ઉદાહરણો ટાંકીને યાદ અપાવ્યું કે ભારત હંમેશા પાડોશી દેશ સામે પ્રભુત્વ જાળવી રાખ્યું છે. હવે જ્યારે 15 ફેબ્રુઆરીએ કોલંબોમાં ટક્કર નક્કી છે, ત્યારે પાકિસ્તાનનું આ વલણ ક્રિકેટ ચાહકોને નિરાશ કરી રહ્યું છે.

બીજી તરફ, ICC એ પણ પાકિસ્તાન ક્રિકેટ બોર્ડ (PCB) ને કડક શબ્દોમાં ચેતવણી આપી દીધી છે. જો પાકિસ્તાન આ બ્લોકબસ્ટર મેચનો બહિષ્કાર કરશે, તો તેમણે માત્ર મેદાન પર જ નહીં પરંતુ આર્થિક રીતે પણ ભારે દંડ ભોગવવો પડશે. ભારત-પાકિસ્તાન મેચ એ કોઈપણ ટુર્નામેન્ટની જીવાદોરી સમાન હોય છે અને કરોડોની આવક તેના પર નિર્ભર હોય છે. આવી સ્થિતિમાં સૂર્યાનો આક્રમક અંદાજ સૂચવે છે કે ભારતીય ટીમ માનસિક રીતે તૈયાર છે, હવે જોવાનું એ રહેશે કે પાકિસ્તાન ટીમ કોલંબોની ફ્લાઈટ પકડે છે કે પછી 'વોકઆઉટ' કરીને હાર સ્વીકારી લે છે.