ટોક્યો, તા.5: જાપાનના સૌથી પ્રખ્યાત પ્રતીક ગણાતા માઉન્ટ ફુજીના અદભૂત નજારા સાથે ઉજવાતો ‘ચેરી બ્લોસમ ફેસ્ટિવલ’ આ વર્ષે જોવા મળશે નહીં. જાપાનના ફુજીયોશિદા શહેરે એક સનસનાટીભર્યા નિર્ણયમાં આ ઉત્સવને રદ કરવાની જાહેરાત કરી છે. આ નિર્ણય પાછળનું મુખ્ય કારણ ‘ઓવર-ટૂરિઝમ’ એટલે કે પ્રવાસીઓનો અસહ્ય ધસારો છે, જેના કારણે સ્થાનિક લોકોનું જીવન નરક જેવું બની ગયું હોવાની ફરિયાદો ઉઠી હતી.

યેનના ઘટતા મૂલ્યને કારણે વર્ષ 2025માં રેકોર્ડબ્રેક 4.27 કરોડ પ્રવાસીઓ જાપાન પહોંચ્યા છે. ફુજીયોશિદામાં માઉન્ટ ફુજી અને પાંચ માળના પેગોડાનો નજારો કેમેરામાં કેદ કરવા માટે પ્રવાસીઓ એટલા આંધળા બન્યા કે તેઓ સ્થાનિક લોકોના ખાનગી બગીચાઓમાં ઘૂસી જવા લાગ્યા. મેયર શિગેરુ હોરીયુચીએ દુઃખ સાથે જણાવ્યું કે, પ્રવાસીઓ દ્વારા ગંદકી ફેલાવવી, ટ્રાફિક જામ કરવો અને ગમે ત્યાં શૌચ કરવા જેવી ઘટનાઓ વધી જતાં નાગરિકોની ગરિમા બચાવવા માટે આ 10 વર્ષ જૂના ઉત્સવ પર પડદો પાડવો પડ્યો છે.

ફોટોગ્રાફીના શોખે સર્જી કટોકટી

માઉન્ટ ફુજીના ‘ઇન્સ્ટાગ્રામેબલ’ વ્યૂ મેળવવાની હોડમાં વિદેશી પ્રવાસીઓ સ્થાનિક મર્યાદાઓ ભૂલી રહ્યા છે. ક્યોટો જેવા શહેરોમાં પણ ગીશા કલાકારોને હેરાન કરવાના કિસ્સાઓ પ્રકાશમાં આવ્યા છે. વહીવટીતંત્રને ડર છે કે ઉત્સવ રદ કરવા છતાં વસંત ઋતુમાં પ્રવાસીઓ તો આવશે જ, તેથી ભીડને નિયંત્રિત કરવા માટે ભવિષ્યમાં વધુ કડક કાયદાઓ અને એન્ટ્રી ફી દાખલ કરવામાં આવી શકે છે.

પરિસ્થિતિ પર એક નજર:

• ઐતિહાસિક આંકડો: 2025 માં અત્યાર સુધીના સૌથી વધુ 42.7 મિલિયન પ્રવાસીઓ જાપાન આવ્યા.
• મુખ્ય સમસ્યા: ટ્રાફિક જામ, ગંદકી અને સ્થાનિક રહેવાસીઓની પ્રાઈવસીનો ભંગ.
• અગાઉના પગલાં: વ્યૂ-બ્લોકિંગ બેરિયર્સ (દ્રશ્ય રોકતી દીવાલો) અને હાઈકર્સ પર લિમિટ લાદવામાં આવી હતી.
• ભવિષ્ય: પ્રવાસન વધારવાને બદલે હવે 'ક્વોલિટી ટુરિઝમ' પર ધ્યાન કેન્દ્રિત કરાશે.