ગુવાહાટી : ભારતીય ચેસના ઈતિહાસમાં આસામના ૧૧ વર્ષના તેજસ્વી ખેલાડી વિરાજ સરાવગીએ એક નવું પ્રકરણ લખ્યું છે. તાજેતરમાં ઈટાલી અને જર્મનીમાં યોજાયેલી આંતરરાષ્ટ્રીય FIDE-રેટેડ ટુર્નામેન્ટમાં વિરાજે પોતાનાથી બમણી ઉંમરના અને અનુભવી ખેલાડીઓને માત આપીને વૈશ્વિક ચેસ સમુદાયને ચોંકાવી દીધા છે. પોતાના પ્રથમ યુરોપિયન પ્રવાસમાં જ વિરાજે રેકોર્ડબ્રેક ૨૯૦ FIDE Elo રેટિંગ પોઈન્ટ્સ હાંસલ કર્યા છે.
ઈટાલીમાં રેટિંગ સર્કિટમાં 'આગ' લગાવી
રોયલ ગ્લોબલ સ્કૂલના ધોરણ ૬ માં અભ્યાસ કરતા વિરાજે ઈટાલિયન ઈન્ટરનેશનલ ઓપનમાં ૧૭૦૦ થી વધુ Elo રેટિંગ ધરાવતા ખેલાડીઓ સામે ૫ માંથી ૩.૫ પોઈન્ટ મેળવ્યા હતા. અહીં તેણે ૧૨૨ રેટિંગ પોઈન્ટ્સનો જંગી ઉછાળો નોંધાવ્યો હતો. તેની રમતની પરિપક્વતા જોઈને યુરોપિયન કોચ પણ આશ્ચર્યચકિત થઈ ગયા હતા.
જર્મનીમાં પણ વિજયકૂચ જારી
ઈટાલી બાદ જર્મનીના નોર્ડવેસ્ટ કપમાં પણ વિરાજનું શાનદાર ફોર્મ ચાલુ રહ્યું હતું. ૨૦૦૦ Elo પોઈન્ટ્સ ધરાવતા દિગ્ગજ યુરોપિયન ખેલાડીઓ સામે મજબૂત રમત રમીને તેણે વધુ ૧૬૧ પોઈન્ટ્સ પોતાના નામે કર્યા હતા. આમ, માત્ર એક જ પ્રવાસમાં કુલ ૨૯૦ પોઈન્ટ્સ મેળવીને તેણે ભારતીય ચેસના ભાવિ તરીકે પોતાની દાવેદારી મજબૂત કરી છે.
મુંબઈમાં મળી રહી છે ખાસ તાલીમ
વિરાજ હાલ મુંબઈ ચેસ સેન્ટરમાં શ્રીકાંત શર્મા મલ્લાદી અને તેમની ટીમ પાસે તાલીમ લઈ રહ્યો છે. તેની આ સફળતા પર રશિયન કલ્ચરલ સેન્ટરના ચીફ કોચ દુર્ગા નાગેશ ગુટ્ટુલાએ જણાવ્યું કે, "વિરાજ અત્યંત મહેનતુ અને અપાર ક્ષમતા ધરાવતો ખેલાડી છે. આવનારા દિવસોમાં આપણે આ છોકરા વિશે ઘણું સાંભળવા મળશે. આ આખા ભારત માટે ગર્વની ક્ષણ છે."
આસામના આ નાના છોકરાએ સાબિત કરી દીધું છે કે બુદ્ધિના ખેલમાં ઉંમર નહીં, પણ યોગ્ય તાલીમ અને આત્મવિશ્વાસ મહત્વના છે.