બેલાગવી : કર્ણાટકના બેલાગવી જિલ્લામાં એક એવી લોહિયાળ ઘટના બની છે જેણે કાયદો અને વ્યવસ્થા તેમજ માનવીય સંવેદનાઓ પર સવાલો ઉભા કર્યા છે. એક યુવકે પોતાની માતા સાથે ભાગી ગયેલા વ્યક્તિની અત્યંત નિર્મમ રીતે હત્યા કરી હતી. આ ઘટનાની સૌથી ભયાનક બાબત એ હતી કે હત્યા કર્યા બાદ આરોપી ભાગી જવાને બદલે મૃતકની છાતી પર ઉભો રહ્યો અને પોલીસ ન આવે ત્યાં સુધી ત્યાં જ ઉભો રહ્યો હતો.
૧૦ વર્ષથી સળગતી હતી બદલાની આગ
પોલીસ તપાસમાં બહાર આવ્યું છે કે, મૃતક ૫૧ વર્ષીય બસપ્પા હોસામાણી વર્ષ ૨૦૧૬માં આરોપી એરૈયા મઠપતિની માતા સાથે ભાગી ગયો હતો. ત્યારથી તેઓ કોલ્હાપુરમાં સ્થાયી થયા હતા. આ વાતને લઈને એરૈયાના મનમાં ભારે રોષ હતો અને તે બદલો લેવાની તકની રાહ જોઈ રહ્યો હતો. તાજેતરમાં જ જ્યારે બસપ્પા આ વિસ્તારમાં પાછો ફર્યો, ત્યારે એરૈયાએ તેને પતાવી દેવાનો પ્લાન ઘડ્યો હતો.
જાહેરમાં ખેલાયો મોતનો ખેલ
બુધવારે સાંજે એરૈયા સવદત્તી નજીક યેલમ્મા મંદિર જવાના રસ્તા પર છુપાઈને બેઠો હતો. જેવો બસપ્પા મોટરસાયકલ પર ત્યાંથી પસાર થયો, એરૈયાએ તેને નીચે પાડી દીધો અને છરી વડે એક પછી એક ૧૬ વાર છાતી અને પેટના ભાગે ઝીંકી દીધા. આસપાસના લોકો આ ક્રૂરતા જોઈને સ્તબ્ધ થઈ ગયા હતા, પણ કોઈની વચ્ચે પડવાની હિંમત થઈ નહોતી.
પોલીસને પોતે જ ફોન કર્યો
બપ્પાનું ઘટનાસ્થળે જ મોત નીપજ્યું હતું. હત્યા કર્યા બાદ એરૈયાએ શાંતિથી પોલીસને ફોન કર્યો અને ગુનાની કબૂલાત કરી. પોલીસ ઘટનાસ્થળે પહોંચી ત્યાં સુધી તે લાશ પર ઉભો રહીને જાણે પોતાની જીતની ઉજવણી કરી રહ્યો હોય તેમ ઉભો રહ્યો હતો. પોલીસે આરોપી એરૈયાની ધરપકડ કરી છે અને હત્યાનો ગુનો નોંધી વધુ તપાસ હાથ ધરી છે.
આ ઘટનાએ સમગ્ર બેલાગવી પંથકમાં ભારે સનસનાટી મચાવી દીધી છે. દાયકા જૂની પારિવારિક અદાવતનો આવો કરુણ અને બિહામણો અંત આવશે તેવી કોઈએ કલ્પના પણ કરી નહોતી.