પિંપરી-ચિંચવડ : મહારાષ્ટ્રની લાઈફલાઈન ગણાતા મુંબઈ-પુણે એક્સપ્રેસવે પર મંગળવાર સાંજથી મુસાફરો માટે કાળઝાળ કસોટી જેવી સ્થિતિ સર્જાઈ છે. રાયગઢના આદોશી ટનલ પાસે એક ગેસ ટેન્કર પલટી જતાં સર્જાયેલા અકસ્માતને કારણે હજારો વાહનોના પૈડાં થંભી ગયા હતા. ૧૮ કલાકથી વધુ સમયથી ભૂખ્યા અને તરસ્યા ફસાયેલા આ મુસાફરોની વહારે પુણે ગ્રામીણ પોલીસ આવી છે, જેમણે હાઈવે પર જઈને ભોજન અને પાણીનું વિતરણ શરૂ કર્યું છે.
અકસ્માતે સર્જી ૫૦ કિમી લાંબી કતાર
મંગળવારે સાંજે ૫ વાગ્યે અત્યંત જ્વલનશીલ ગેસ ભરેલું ટેન્કર પલટી જતાં સુરક્ષાના કારણોસર ટ્રાફિક અટકાવી દેવામાં આવ્યો હતો. ગેસ લીકેજને કારણે સર્જાયેલા ભયના પગલે એક્સપ્રેસવે અને જૂના હાઈવે બંને ઠપ થઈ ગયા હતા. બુધવારે બપોર સુધીમાં વાહનોની કતાર ૫૦ કિલોમીટર સુધી પહોંચી ગઈ હતી. ધોમધખતા તાપમાં એસી વગરની ગાડીઓમાં ફસાયેલા લોકો માટે સ્થિતિ અસહ્ય બની ગઈ હતી.
પોલીસનો માનવતાવાદી અભિગમ
પુણે ગ્રામીણ એસપી સંદીપ સિંહ ગિલના માર્ગદર્શન હેઠળ લોનાવાલા પોલીસની ટીમો ટુ-વ્હીલર પર સવાર થઈને હાઈવે પર નીકળી પડી હતી. વાયરલ વીડિયોમાં જોઈ શકાય છે કે પોલીસ જવાનો કારની વચ્ચે જઈને નાના બાળકો, વૃદ્ધો અને દર્દીઓને બિસ્કિટના પેકેટ અને પાણીની બોટલો આપી રહ્યા છે. ખાસ કરીને લાતુર જેવા જિલ્લાઓમાંથી મુંબઈ સારવાર માટે જઈ રહેલા કેન્સરના દર્દીઓ માટે પોલીસની આ મદદ સંજીવની સમાન સાબિત થઈ છે.
વૈકલ્પિક માર્ગોનો ઉપયોગ કરવા અપીલ
તંત્ર દ્વારા આદોશી ટનલ પાસે કાટમાળ હટાવવાની કામગીરી યુદ્ધના ધોરણે ચાલુ છે. જોકે, ટ્રાફિક એટલો વધુ છે કે તેને સામાન્ય થતા બુધવાર સાંજ સુધીનો સમય લાગી શકે છે. પોલીસે વાહનચાલકોને અત્યારે એક્સપ્રેસવે પર આવવાનું ટાળવા અને તામ્હિની અથવા માલશેજ ઘાટ જેવા વૈકલ્પિક માર્ગો પસંદ કરવા વિનંતી કરી છે.