મિર્ઝાપુર:: ઉત્તર પ્રદેશની મિર્ઝાપુર પોલીસે એક મોટી કાર્યવાહી કરતા ધર્માંતરણ રેકેટના કથિત માસ્ટરમાઇન્ડ મૌલવી ખલીલુ રહેમાનની ધરપકડ કરી છે. આ કેસ ત્યારે પ્રકાશમાં આવ્યો જ્યારે શહેરના એક જીમમાં ટ્રેનર દ્વારા હિન્દુ યુવતીઓને ધર્મ પરિવર્તન માટે દબાણ કરવામાં આવતું હોવાનું બહાર આવ્યું હતું. પોલીસ તપાસમાં ખુલાસો થયો છે કે આ આખા ખેલ પાછળ મૌલવી ખલીલુ રહેમાનનો મુખ્ય હાથ હતો.
મેલીવિદ્યાના નામે છેતરપિંડી
પોલીસના જણાવ્યા અનુસાર, આરોપી મૌલવી અત્યંત શાતિર રીતે પોતાનું નેટવર્ક ચલાવતો હતો. તે મેલીવિદ્યા અને જાદુટોણાના બહાને હિન્દુ મહિલાઓ અને બાળકોને પોતાની જાળમાં ફસાવતો હતો. એકવાર સંપર્કમાં આવ્યા બાદ, તેમને ડરાવી-ધમકાવીને અથવા લાલચ આપીને ઈસ્લામ અંગીકાર કરવા માટે પ્રેરિત કરતો હતો. જીમ ટ્રેનર કેસમાં પકડાયેલા અન્ય આરોપીઓ સાથે પણ મૌલવીના સીધા સંબંધો હોવાનું સામે આવ્યું છે.
પોલીસની આકરી કાર્યવાહી
અધિક પોલીસ અધિક્ષક (ઓપરેશન્સ) મનીષ કુમાર મિશ્રાએ સિવિલ લાઇન્સ સ્થિત ઓફિસમાં પત્રકાર પરિષદ યોજીને આ અંગે માહિતી આપી હતી. તેમણે જણાવ્યું કે, મૌલવી વિરુદ્ધ ધર્માંતરણ વિરોધી કાયદા હેઠળ ગુનો દાખલ કરવામાં આવ્યો છે. પોલીસે ટેકનિકલ પુરાવા અને બાતમીદારોની મદદથી આ ઓપરેશન પાર પાડ્યું છે અને હાલમાં મૌલવીને જેલના સળિયા પાછળ ધકેલી દેવામાં આવ્યો છે.
શહેરમાં ચકચાર
જીમ જેવી જાહેર જગ્યાઓનો ઉપયોગ ધર્માંતરણ અને લવ જેહાદ જેવી પ્રવૃત્તિઓ માટે થતો હોવાના સમાચારથી સ્થાનિક લોકોમાં ભારે રોષ જોવા મળી રહ્યો છે. પોલીસ હવે એ દિશામાં તપાસ કરી રહી છે કે આ રેકેટના તાર અન્ય કયા શહેરો કે સંસ્થાઓ સાથે જોડાયેલા છે.