નવી દિલ્હી: તા.૪: ખાનગી ક્ષેત્રની અગ્રણી યસ બેંક (Yes Bank) માં મોટા ફેરફારોના સંકેત મળી રહ્યા છે. રિઝર્વ બેંક ઓફ ઇન્ડિયા (RBI) એ વિનય મુરલીધર ટોન્સે ને બેંકના નવા મેનેજિંગ ડિરેક્ટર અને CEO તરીકેની નિમણૂકને લીલી ઝંડી આપી દીધી છે. વિનય ટોન્સે આગામી ત્રણ વર્ષ સુધી આ પદ સંભાળશે. આ જાહેરાત બાદ આજે શેરબજારમાં યસ બેંકના શેરમાં પણ તેજી જોવા મળી હતી.
કોણ છે વિનય ટોન્સે?
વિનય ટોન્સે બેંકિંગ ક્ષેત્રનો બહોળો અનુભવ ધરાવે છે. આ પદ સંભાળતા પહેલા તેઓ સ્ટેટ બેંક ઓફ ઇન્ડિયા (SBI) માં રિટેલ ઓપરેશન્સનું નેતૃત્વ કરી રહ્યા હતા. તેઓ પ્રશાંત કુમાર નું સ્થાન લેશે, જેમનો કાર્યકાળ 6 એપ્રિલે પૂર્ણ થઈ રહ્યો છે. પ્રશાંત કુમારે 2020 માં મુશ્કેલ સમયમાં બેંકની કમાન સંભાળી હતી અને તેને નાણાકીય કટોકટીમાંથી બહાર કાઢવામાં મહત્વની ભૂમિકા ભજવી હતી.
રોકાણકારોમાં ઉત્સાહ, શેરબજારમાં ઉછાળો
નવા નેતૃત્વના સમાચાર આવતાની સાથે જ રોકાણકારોમાં પોઝિટિવ સેન્ટિમેન્ટ જોવા મળ્યું હતું. બોમ્બે સ્ટોક એક્સચેન્જ (BSE) પર યસ બેંકના શેર 1.03% વધીને ₹21.54 પર બંધ થયા હતા. બજારના નિષ્ણાતો માને છે કે ટોન્સેનો અનુભવ બેંકના રિટેલ બિઝનેસને વધુ મજબૂત બનાવશે.
જાપાનીઝ બેંકનું મોટું રોકાણ અને SBIનો સાથ
યસ બેંકના માલિકી માળખામાં પણ તાજેતરમાં મોટા ફેરફાર થયા છે. જાપાનની સુમિતોમો મિત્સુઇ બેંકિંગ કોર્પોરેશન (SMBC) હાલમાં 24% હિસ્સા સાથે બેંકની સૌથી મોટી શેરહોલ્ડર છે. આ ઉપરાંત, 2020 માં બેંકને બચાવવા માટે આગળ આવેલી SBI પાસે પણ હજુ આશરે 10% હિસ્સો છે.
નવા બોસ વિનય ટોન્સે સામે હવે પડકાર હશે કે તેઓ જાપાનીઝ રોકાણ અને ભારતની સ્થાનિક બેંકિંગ શક્તિનો ઉપયોગ કરીને યસ બેંકને ફરીથી ટોચની ખાનગી બેંકોની યાદીમાં સામેલ કરે.