ગાઝિયાબાદ: ઉત્તર પ્રદેશના ગાઝિયાબાદની 'ભારત સિટી' સોસાયટીમાં એક અત્યંત ચોંકાવનારી અને દુઃખદ ઘટના સામે આવી છે. ઓનલાઇન ગેમિંગના રવાડે ચડેલી ત્રણ સગી બહેનોએ એકસાથે ૯મા માળેથી મોતની છલાંગ લગાવી જીવન ટૂંકાવ્યું છે. પોલીસ તપાસમાં બહાર આવ્યું છે કે ત્રણેય બહેનો 'કોરિયન લવર' નામની ટાસ્ક-બેઝ્ડ ઓનલાઇન ગેમની વ્યસની હતી.

સુસાઇડ નોટમાં હૃદયસ્પર્શી કબૂલાત: "મમ્મી-પપ્પા સોરી, અમે ગેમ નથી છોડી શકતા"

ઘટનાસ્થળેથી પોલીસને એક સુસાઇડ નોટ અને ડાયરી મળી આવી છે, જે આ કરુણ અંજામ પાછળનું કારણ સ્પષ્ટ કરે છે. સુસાઇડ નોટમાં બાળકીઓએ લખ્યું છે કે:"સોરી મમ્મી-પપ્પા, અમે આ ગેમ છોડી શકતા નથી. આ ડાયરીમાં જે કંઈ પણ લખ્યું છે તે બધું સાચું છે, તમે તે વાંચી લેજો... સોરી મમ્મી-પપ્પા!"

માહિતી મુજબ, આ બહેનો (નિશિકા-૧૬ વર્ષ, પ્રાચી-૧૪ વર્ષ અને પાખી-૧૩ વર્ષ) કોરોના કાળ દરમિયાન ઓનલાઇન અભ્યાસ માટે મળેલા મોબાઈલના કારણે ગેમિંગની લતે ચડી હતી. પિતાએ ગેમ રમવા બાબતે ઠપકો આપતા અને મોબાઈલ લેવાની મનાઈ કરતા, ત્રણેય બહેનોએ રાત્રે ૨ વાગ્યે આ આત્મઘાતી પગલું ભર્યું હતું.

શું છે આ 'કોરિયન લવર' ગેમ? ડિજિટલ પ્લેટફોર્મ્સ અને સોશિયલ મીડિયા (એક્સ) પર ઉપલબ્ધ વિગતો મુજબ, 'કોરિયન લવર' અથવા તેના જેવી ટાસ્ક-બેઝ્ડ ગેમ્સ કિશોરો માટે અત્યંત જોખમી સાબિત થઈ રહી છે:

* ટાસ્ક આધારિત ગેમ: આ ગેમમાં ખેલાડીઓને અલગ-અલગ ટાસ્ક (કાર્યો) આપવામાં આવે છે. જેમ-જેમ લેવલ વધે છે, તેમ તેમ ટાસ્ક વધુ જોખમી અને માનસિક રીતે દબાણ લાવનારા બને છે.

  સાયકોલોજિકલ મેનીપ્યુલેશન: આ ગેમ્સ બાળકોને ભાવનાત્મક રીતે જકડી લે છે. ઘણીવાર તેમાં 'રોમેન્ટિક' કે 'વર્ચ્યુઅલ લવ'ના નામે બાળકોને એડિક્ટ કરવામાં આવે છે, જેના કારણે તેઓ વાસ્તવિક દુનિયાથી કપાઈ જાય છે.

* ડાર્ક વેબ અને અજ્ઞાત લિંક્સ: આવી ગેમ્સ ઘણીવાર સત્તાવાર પ્લે સ્ટોર પર હોતી નથી, પરંતુ સોશિયલ મીડિયા ગ્રુપ્સ કે અજ્ઞાત લિંક્સ દ્વારા ડાઉનલોડ કરવામાં આવે છે. બ્લુ વ્હેલ ગેમની જેમ, આમાં પણ અંતિમ ટાસ્ક ઘણીવાર જીવલેણ હોય છે.

નિષ્ણાતોની ચેતવણી: પોલીસ અને મનોવૈજ્ઞાનિકો વાલીઓને અપીલ કરી રહ્યા છે કે જો તમારું બાળક અચાનક ચીડિયાપણું અનુભવે, રાત્રે મોડે સુધી જાગે અથવા મોબાઈલ વગર બેચેન થઈ જાય, તો તે ગંભીર સંકેત હોઈ શકે છે. ગાઝિયાબાદ પોલીસે આ મામલે ગેમિંગ એપના સંચાલકો વિરુદ્ધ તપાસ તેજ કરી છે.