નવી દિલ્હી:કેન્દ્ર સરકારના લાખો કર્મચારીઓ અને પેન્શનરો માટે માર્ચ મહિનો આર્થિક રીતે શાનદાર રહેવાનો છે. શ્રમ બ્યુરો દ્વારા ડિસેમ્બર 2025ના ગ્રાહક ભાવ સૂચકાંક (CPI-IW) ના આંકડા જાહેર કરવામાં આવ્યા છે, જે મુજબ મોંઘવારી ભથ્થું (DA) હવે 60% (ચોક્કસ કહીએ તો 60.35%) ના સ્તરને વટાવી ગયું છે. સરકાર હંમેશા પૂર્ણાંકમાં જ વધારો કરે છે, તેથી હવે 60% DA મળવું નિશ્ચિત માનવામાં આવે છે.
 જો કોઈ કર્મચારીનો મૂળભૂત પગાર  ₹50,000 હોય, તો અત્યાર સુધી તેમને 58% ના દરે ₹29,000 ભથ્થું મળતું હતું. હવે 60% મુજબ આ રકમ વધીને ₹30,000 થઈ જશે. એટલે કે દર મહિને સીધો ₹1,000નો વધારો થશે. તેવી જ રીતે પેન્શનરોને પણ દર મહિને ₹600 થી ₹700 નો ફાયદો થવાની ધારણા છે.
 7મા પગાર પંચ હેઠળ 60% DA એ એક મોટો આંકડો છે. અગાઉ જ્યારે DA 50% એ પહોંચ્યું હતું ત્યારે HRA માળખામાં ફેરફાર થયો હતો. હવે 60% ના સ્તર બાદ સરકારી વર્તુળોમાં 8માં પગાર પંચની ચર્ચાઓ વધુ તેજ બનશે. કર્મચારી સંગઠનો આ સ્તરને પગાર પુનઃનિર્માણ માટે એક મજબૂત આધાર માની રહ્યા છે.
સરકારી પ્રક્રિયા મુજબ, ડિસેમ્બરના આંકડા આવ્યા બાદ માર્ચ મહિનામાં કેબિનેટની બેઠકમાં તેની સત્તાવાર જાહેરાત કરવામાં આવશે. જોકે, આ વધારો 1 જાન્યુઆરી, 2026 થી જ અમલમાં ગણાશે. એટલે કે જ્યારે માર્ચનો પગાર આવશે ત્યારે કર્મચારીઓને જાન્યુઆરી અને ફેબ્રુઆરી મહિનાનું બાકી નીકળતું તફાવતનું નાણું (Arrears) પણ સાથે મળશે.