નવી દિલ્હી:  ભારત અને અમેરિકા વચ્ચે એક નવા આર્થિક યુગની શરૂઆત થઈ છે. વડાપ્રધાન નરેન્દ્ર મોદી અને રાષ્ટ્રપતિ ડોનાલ્ડ ટ્રમ્પ વચ્ચેના ગાઢ સંબંધોના પરિણામે એક ઐતિહાસિક વેપાર કરારને અંતિમ સ્વરૂપ આપવામાં આવ્યું છે. આ કરારની સૌથી મોટી હાઈલાઈટ એ છે કે અમેરિકાએ ભારત સામેના 'રેસિપ્રોકલ ટેરિફ'ને 25% થી ઘટાડીને 18% કરી દીધા છે. વાણિજ્ય મંત્રી પીયૂષ ગોયલે આ ડીલને ભારત માટે "સુવર્ણ તક" ગણાવતા કહ્યું કે, આ કરાર આપણા પડોશી દેશો અને સ્પર્ધકોની સરખામણીમાં ભારતને વૈશ્વિક બજારમાં ઘણું આગળ લઈ જશે. આ સમજૂતીથી ભારતીય નિકાસકારો માટે અમેરિકાના દ્વાર વધુ સરળતાથી ખુલશે.

ખેડૂતોની ચિંતાઓને દૂર કરતા પીયૂષ ગોયલે સ્પષ્ટ આશ્વાસન આપ્યું છે કે આ વેપાર કરારથી ભારતીય કૃષિ ક્ષેત્રને કોઈ નુકસાન નહીં પહોંચે. તેમણે ભારપૂર્વક જણાવ્યું કે, "દેશના ડેરી અને કૃષિ ક્ષેત્રો સંપૂર્ણપણે સુરક્ષિત છે." સરકારે રાષ્ટ્રીય હિત અને જાહેર હિતને સર્વોપરી રાખીને જ આ શરતો મંજૂર કરી છે. વિપક્ષી દળો દ્વારા કરવામાં આવતા પ્રચાર વચ્ચે સરકારે સ્પષ્ટ કર્યું છે કે નાના ખેડૂતોના હિતો સાથે કોઈ બાંધછોડ કરવામાં આવી નથી, ઉલટું આ કરારથી ભારતીય ઉત્પાદનોને આંતરરાષ્ટ્રીય સ્તરે મોટી ઓળખ મળશે અને ખેડૂતોની આવકમાં વધારો થશે.

જોકે, આ ઐતિહાસિક સિદ્ધિની જાહેરાત દરમિયાન સંસદમાં ભારે હોબાળો જોવા મળ્યો હતો. પીયૂષ ગોયલે વિપક્ષ, ખાસ કરીને રાહુલ ગાંધી અને કોંગ્રેસ પર આકરા પ્રહારો કરતા કહ્યું કે, વિપક્ષી દળોએ સંસદમાં જે વર્તન કર્યું તે લોકશાહી માટે શરમજનક છે. તેમણે આરોપ લગાવ્યો કે જ્યારે દેશના ભવિષ્ય માટે આટલો મહત્વનો કરાર થયો છે, ત્યારે વિપક્ષ સ્પીકરની ખુરશીનું અપમાન કરીને ચર્ચામાં અવરોધ ઊભો કરી રહ્યો છે. સંસદમાં મડાગાંઠને કારણે સરકારે પ્રેસ કોન્ફરન્સ દ્વારા જનતા સુધી આ માહિતી પહોંચાડવી પડી છે, જે વિપક્ષની બિનજવાબદારી દર્શાવે છે.