કિવ :  રશિયા અને યુક્રેન વચ્ચેનું યુદ્ધ હવે વધુ વિનાશક અને ક્રૂર તબક્કામાં પ્રવેશ્યું છે. મંગળવારે રશિયાએ યુક્રેનના ઉર્જા માળખાને નિશાન બનાવીને અત્યાર સુધીનો સૌથી મોટો હવાઈ હુમલો કર્યો હતો. યુક્રેનના રાષ્ટ્રપતિ વોલોડીમીર ઝેલેન્સકીએ પુષ્ટિ કરી છે કે રશિયન સેનાએ ૭૦ થી વધુ બેલિસ્ટિક મિસાઇલો અને ૪૫૦ થી વધુ આત્મઘાતી ડ્રોન દ્વારા કિવ, ખાર્કિવ અને ઓડેસા સહિતના અનેક શહેરોને બાનમાં લીધા હતા. આ હુમલાનો મુખ્ય ઉદ્દેશ્ય ઠંડીના શિખર સમયે યુક્રેનની વીજળી અને ગરમીની વ્યવસ્થાને તોડી પાડવાનો હતો, જેથી સામાન્ય જનતાને ઘૂંટણિયે લાવી શકાય.

આ ભયાનક હુમલાની સૌથી પીડાદાયક અસર કિવમાં જોવા મળી છે, જ્યાં માઈનસ ૨૦ ડિગ્રી સેલ્સિયસની હાડ થીજવતી ઠંડીમાં ૧,૦૦૦ થી વધુ રહેણાંક ઇમારતોમાં હીટિંગ સિસ્ટમ ઠપ થઈ ગઈ છે. આ હુમલામાં માત્ર આધુનિક માળખું જ નહીં, પરંતુ યુક્રેનની ઐતિહાસિક વિરાસતને પણ નિશાન બનાવવામાં આવી છે. બીજા વિશ્વયુદ્ધનું પ્રતિક ગણાતું પ્રખ્યાત 'મધરલેન્ડ સ્મારક' (માતૃભૂમિ સ્મારક) આ હુમલામાં ક્ષતિગ્રસ્ત થયું છે. યુક્રેનના સાંસ્કૃતિક મંત્રીએ આ ઘટનાને નિંદનીય ગણાવતા કહ્યું કે રશિયા ૨૦મી સદીના વિનાશક યુદ્ધોની યાદોને ૨૧મી સદીમાં ફરીથી તાજી કરી રહ્યું છે.

યુક્રેનની સેના અને ટેકનિકલ ટીમો અત્યારે યુદ્ધના ધોરણે સમારકામમાં લાગી ગઈ છે, પરંતુ ઠંડી અને સતત થતા હુમલાઓ રાહત કાર્યમાં મોટો અવરોધ બની રહ્યા છે. આ હુમલામાં નવ લોકો ગંભીર રીતે ઘાયલ થયા હોવાના અહેવાલ છે અને અનેક પરિવારો બેઘર બન્યા છે. ઝેલેન્સકીએ આંતરરાષ્ટ્રીય સમુદાયને અપીલ કરી છે કે રશિયા જાણી જોઈને શિયાળાને હથિયાર તરીકે વાપરી રહ્યું છે, જે માનવતા વિરુદ્ધનો મોટો અપરાધ છે. વૈશ્વિક સ્તરે શાંતિ વાટાઘાટોની ચર્ચાઓ વચ્ચે રશિયાના આ આક્રમક વલણે વિશ્વભરમાં ચિંતા જગાવી છે.