સ્ટોકહોમ,  : સ્વીડનમાં મહિલાઓ વિરુદ્ધ વધતી જતી હિંસાની ઘટનાઓએ સમગ્ર દેશને હચમચાવી દીધો છે. આ ગંભીર સામાજિક સમસ્યાનો જડમૂળથી નાશ કરવા માટે વડાપ્રધાન ઉલ્ફ ક્રિસ્ટરસન મેદાનમાં આવ્યા છે. તેમણે 'ક્વિનોફ્રીડ' (Kvinnofrid - મહિલાઓ માટે શાંતિ) નામની એક હાઈ-લેવલ મંત્રી પરિષદની રચના કરી છે, જેનું નેતૃત્વ તેઓ પોતે કરશે. આ પહેલનો મુખ્ય હેતુ વિવિધ સરકારી એજન્સીઓ વચ્ચે સંકલન સાધીને ગુનેગારો સામે કડક કાર્યવાહી કરવાનો છે.
ઐતિહાસિક કાયદાનો આધુનિક અવતાર
'ક્વિનોફ્રીડ' શબ્દ સ્વીડનની પરંપરામાં ખૂબ જ પવિત્ર માનવામાં આવે છે. 13મી સદીમાં મહિલાઓ પરના હુમલા અને અપહરણ રોકવા માટે જે શાંતિ કાયદાઓ બનાવવામાં આવ્યા હતા, તેના પરથી આ નામ રાખવામાં આવ્યું છે. પીએમ ક્રિસ્ટરસનએ સ્પષ્ટ કર્યું છે કે આ કાઉન્સિલ માત્ર ઘરેલુ હિંસા જ નહીં, પણ માનસિક ઉત્પીડન અને 'ઓનર કિલિંગ' (સન્માનના નામે હિંસા) જેવી કુપ્રથાઓ પર પણ લગામ કસશે.
હત્યાની બે ઘટનાઓએ દેશમાં આક્રોશ જગાડ્યો
ડિસેમ્બર 2025ના અંતમાં સ્વીડનના રોનિંગે અને બોડેન શહેરમાં બનેલી બે હાઈ-પ્રોફાઈલ હત્યાની ઘટનાઓએ સ્વીડિશ વહીવટીતંત્રની ઉંઘ ઉડાડી દીધી હતી. 25 વર્ષની યુવતીની નિર્મમ હત્યા બાદ સુરક્ષા એજન્સીઓના જોખમ મૂલ્યાંકન (Risk Assessment) પર સવાલો ઉઠ્યા હતા. આ ઘટનાઓ બાદ જ ન્યાય મંત્રી ગુન્નાર સ્ટ્રોમરે કડક શબ્દોમાં કહ્યું હતું કે, "ખતરનાક પુરુષોને જેલના સળિયા પાછળ ધકેલી દેવા જોઈએ જેથી મહિલાઓ જાહેરમાં સુરક્ષિત અનુભવી શકે."
નિયમો બનશે વધુ કઠોર
નવી પહેલ હેઠળ, કેબિનેટે પેરોલ (જેલમુક્તિ)ના નિયમોને વધુ કડક બનાવવાનો અને વારંવાર હિંસા કરતા ગુનેગારોની તપાસ પ્રક્રિયાને મજબૂત કરવાનો નિર્ણય લીધો છે. સરકારનો લક્ષ્ય એ છે કે કોઈ પણ હિંસક માનસિકતા ધરાવતો પુરુષ છૂટો ન ફરે અને દેશની દરેક મહિલા નિર્ભય બનીને જીવી શકે. આ વૈશ્વિક સ્તરે મહિલા સુરક્ષા માટે એક અનુકરણીય ઉદાહરણ માનવામાં આવી રહ્યું છે.