નવી દિલ્હી: શું તમે ક્યારેય વિચાર્યું છે કે તમારા હાથમાં રહેલા સ્માર્ટફોનથી લઈને છત પર લાગેલી સોલર પેનલ સુધી વપરાતી ચાંદી ક્યાંથી આવે છે? 'વર્લ્ડ સિલ્વર સર્વે 2025'ના તાજા રિપોર્ટ મુજબ, વિશ્વમાં ચાંદીનો પુરવઠો માત્ર ગણીગાંઠી વિશાળ ખાણો પર ટકેલો છે. જો આ ખાણોમાં એક દિવસ પણ કામ અટકી જાય, તો આખી દુનિયામાં ચાંદીની અછત સર્જાઈ શકે છે. હાલમાં મેક્સિકો ચાંદીના ઉત્પાદનમાં વિશ્વમાં મોખરે છે, પણ અન્ય દેશો પણ હવે આ રેસમાં તેજીથી આગળ વધી રહ્યા છે.
 દુનિયાની સૌથી મોટી ચાંદીની ખાણ મેક્સિકોની 'પેનાસ્કીટો' (Peñasquito) છે, જ્યાંથી વર્ષે ૩૩ મિલિયન ઔંસ ચાંદી નીકળે છે. આ ઉપરાંત મેક્સિકોની જ 'ફ્રેસનીલો' ખાણ દુનિયાની સૌથી જૂની અને મુખ્ય ચાંદીની ખાણ ગણાય છે. મેક્સિકો પોતાની અદ્યતન ટેકનોલોજી અને નવા સંયુક્ત સાહસોને કારણે વિશ્વબજારમાં ચાંદીનો પુરવઠો જાળવી રાખવામાં કરોડરજ્જુ સમાન ભૂમિકા ભજવે છે.
 અમેરિકાના અલાસ્કામાં આવેલી 'ગ્રીન્સ ક્રીક' ખાણ ઉચ્ચ ગુણવત્તાની ચાંદી માટે જાણીતી છે, જ્યારે 'રોચેસ્ટર' ખાણના વિસ્તરણને કારણે અમેરિકાના કુલ ઉત્પાદનમાં ૧૦%નો ઉછાળો જોવા મળ્યો છે. બીજી તરફ, પોલેન્ડમાં તાંબુ કાઢતી વખતે પેટા-ઉત્પાદન તરીકે એટલી બધી ચાંદી નીકળે છે કે તે વિશ્વના ટોપ ઉત્પાદકોમાં સામેલ થઈ ગયું છે. બોલિવિયા અને પેરુ પણ પોતાની ખાણો દ્વારા વૈશ્વિક બજારમાં નોંધપાત્ર હિસ્સો ધરાવે છે.
વર્ષ ૨૦૨૬માં ચાંદીની કિંમતોમાં અત્યાર સુધીમાં ૬૦% જેટલો તોતિંગ વધારો જોવા મળ્યો છે. હાલમાં ચાંદીના ભાવ ₹૩,૭૭,૯૪૮ પ્રતિ કિલોની ઐતિહાસિક સપાટીને સ્પર્શી ગયા છે. નિષ્ણાતોના મતે, એકતરફ સોલર અને ઇલેક્ટ્રોનિક્સ ઉદ્યોગમાં ચાંદીની માંગ વધી રહી છે અને બીજી તરફ નવી ખાણો મળતી નથી. જો આ સ્થિતિ ચાલુ રહેશે, તો આગામી સમયમાં ચાંદીના ભાવમાં હજુ પણ મોટી હલચલ જોવા મળી શકે છે.