ઓટાવા, તા. 28 : યુનાઇટેડ સ્ટેટ્સ અને કેનેડા વચ્ચેના સંબંધોમાં અત્યારે ભારે કડવાશ જોવા મળી રહી છે. કેનેડાના વડાપ્રધાન માર્ક કાર્નેએ અમેરિકાની વર્તમાન સ્થિતિ અને તેની વેપાર નીતિઓ પર આકરા પ્રહારો કરીને વિવાદ છેડ્યો છે. તેમણે સ્પષ્ટપણે જણાવ્યું છે કે વોશિંગ્ટન હવે બદલાઈ ગયું છે અને ત્યાં હવે કશું જ 'નોર્મલ' રહ્યું નથી.
દાવોસના ભાષણથી શરૂ થયો વિવાદ
ગયા અઠવાડિયે સ્વિટ્ઝર્લૅન્ડના દાવોસમાં વર્લ્ડ ઈકોનોમિક ફોરમ દરમિયાન માર્ક કાર્નેએ એક ભાષણ આપ્યું હતું. આ ભાષણમાં તેમણે વિશ્વના દેશોને એવી ચેતવણી આપી હતી કે જે વૈશ્વિક વ્યવસ્થાના નિયમો એક સમયે અમેરિકાએ બનાવ્યા હતા, હવે તે જ નિયમોનો અંત આવી રહ્યો છે. આ ટિપ્પણીથી રાષ્ટ્રપતિ ડોનાલ્ડ ટ્રમ્પ લાલચોળ થઈ ગયા હતા અને તેમણે કેનેડાને ૧૦૦% ટેરિફ (કર) લાદવાની પણ ધમકી આપી દીધી હતી.
ટ્રમ્પની ધમકી અને કાર્નેનો વળતો જવાબ
ટ્રમ્પે એવી દલીલ કરી હતી કે કેનેડાનું અસ્તિત્વ માત્ર અમેરિકાને કારણે જ છે. જોકે, માર્ક કાર્ને નમતું જોખવા તૈયાર નથી. સોમવારે ટ્રમ્પ સાથે વાત કર્યા પછી, જ્યારે એવી ચર્ચાઓ શરૂ થઈ કે કાર્ને પોતાની ટિપ્પણી પાછી ખેંચી રહ્યા છે, ત્યારે મંગળવારે કાર્નેએ સ્પષ્ટતા કરી હતી કે, "મેં જે કહ્યું હતું તે જ કહ્યું છે." તેમણે ગૃહને જણાવ્યું કે કેનેડા હવે અમેરિકા પરની પોતાની નિર્ભરતા ઘટાડીને વિશ્વના અન્ય દેશો સાથે વેપાર કરવા પર ધ્યાન કેન્દ્રિત કરી રહ્યું છે.
વ્યાપાર કરારનું ભવિષ્ય જોખમમાં?
કેનેડા તેની ૭૦% નિકાસ અમેરિકાને કરે છે, જે USMCA (અમેરિકા-મેક્સિકો-કેનેડા) કરાર હેઠળ છે. માર્ક કાર્નેએ જાહેરાત કરી છે કે આ કરારની ઔપચારિક સમીક્ષા આગામી થોડા અઠવાડિયામાં શરૂ થશે. બીજી તરફ, ટ્રમ્પ આ કરારને પહેલેથી જ 'નકામો' ગણાવી ચૂક્યા છે.
હવે જોવાનું એ રહેશે કે ઉત્તર અમેરિકાના આ બે પડોશી દેશો વચ્ચેની આ ટક્કર વિશ્વના અર્થતંત્ર પર કેવી અસર કરે છે.