ઉજ્જૈન : મહાકાલની નગરી ઉજ્જૈન પાસે આવેલા તરાના તાલુકામાં ગુરુવારે સાંજે ફાટી નીકળેલી હિંસાએ ઉગ્ર સ્વરૂપ ધારણ કર્યું છે. બે જૂથો વચ્ચેના નજીવા વિવાદે જોતજોતામાં હિંસક અથડામણનું રૂપ લેતા આખું શહેર સળગી ઉઠ્યું હતું. પથ્થરબાજોએ બસ સ્ટેન્ડ પર પાર્ક કરેલી ૧૫ જેટલી પેસેન્જર બસો અને અનેક ખાનગી વાહનોમાં તોડફોડ કરી મોટું નુકસાન પહોંચાડ્યું છે. હાલ સમગ્ર વિસ્તારમાં ભારે પોલીસ બંદોબસ્ત તૈનાત કરી દેવામાં આવ્યો છે.
 
કેવી રીતે શરૂ થઈ હિંસા?
ઘટનાની શરૂઆત ગુરુવારે સાંજે ૭:૩૦ વાગ્યાની આસપાસ તરાનાના મોટા રામ મંદિર સામે આવેલી સુખલા ગલીમાં થઈ હતી. વિશ્વ હિન્દુ પરિષદ (VHP) ના શહેર મંત્રી સોહેલ ઠાકુર ત્યાં ઉભા હતા, ત્યારે ઇશાન મિર્ઝા અને તેના સાથીઓએ તેમની સાથે ઝઘડો શરૂ કર્યો હતો. વિવાદ એટલો વકર્યો કે સોહેલ ઠાકુર અને તેમના સાથી રજત ઠાકુર પર તીક્ષ્ણ હથિયારોથી જીવલેણ હુમલો કરવામાં આવ્યો. બંનેને ગંભીર હાલતમાં ઉજ્જૈન રિફર કરવામાં આવ્યા છે.
બસ સ્ટેન્ડ બન્યું રણમેદાન, દુકાનોમાં આગ
હુમલાના સમાચાર વાયુવેગે ફેલાતા જ અસામાજિક તત્વોએ રસ્તા પર ઉતરી આવી પથ્થરમારો શરૂ કર્યો હતો. હિંસક ટોળાએ બસ સ્ટેન્ડને નિશાન બનાવી ૧૫ બસોના કાચ તોડી નાખ્યા હતા. આ દરમિયાન બસ સ્ટેન્ડ પાછળ આવેલી એક દુકાનમાં પણ આગ લગાવી દેવામાં આવતા અફરાતફરી મચી ગઈ હતી. સામાન્ય રીતે ધમધમતું બસ સ્ટેન્ડ અત્યારે કાચના ટુકડા અને ભંગારથી ભરેલું જોવા મળી રહ્યું છે.
પોલીસ સ્ટેશનમાં હનુમાન ચાલીસા અને કડક કાર્યવાહી
હિંસાના વિરોધમાં મોટી સંખ્યામાં હિન્દુ સંગઠનોના કાર્યકરો પોલીસ સ્ટેશન પહોંચ્યા હતા અને સ્ટેશનની અંદર જ બેસીને હનુમાન ચાલીસાના પાઠ શરૂ કર્યા હતા. પ્રદર્શનકારીઓએ આરોપીઓના ઘર તોડી પાડવાની માંગ કરી છે. પોલીસે આ મામલે ત્વરિત કાર્યવાહી કરતા સુપ્પન મિર્ઝા અને ઇશાન મિર્ઝા સહિત ૫ આરોપીઓની ધરપકડ કરી છે, જ્યારે એક સગીર આરોપી હજુ ફરાર છે.
વર્તમાન સ્થિતિ: ઉજ્જૈન પોલીસ પ્રશાસને અફવાઓથી બચવા અને શાંતિ જાળવવા અપીલ કરી છે. સમગ્ર તરાનામાં કલમ ૧૪૪ જેવી સ્થિતિ વચ્ચે પોલીસ પેટ્રોલિંગ વધારી દેવામાં આવ્યું છે.