માપુટો (મોઝામ્બિક) : દક્ષિણ આફ્રિકાના દેશ મોઝામ્બિકમાં કુદરતે કહેર વર્તાવ્યો છે. સતત પડી રહેલા અવિરત વરસાદને કારણે અહીંની સ્થિતિ અત્યંત ગંભીર બની ગઈ છે. વિનાશક પૂરના કારણે સેંકડો ગામડાઓ અને શહેરી વિસ્તારો જળબંબોળ થઈ ગયા છે, જેને પગલે લાખો લોકોએ પોતાનું ઘરબાર છોડીને સુરક્ષિત સ્થળે આશરો લેવાની ફરજ પડી છે.
તળાવમાં ફેરવાયા આખેઆખા જિલ્લા
ભારે વરસાદને કારણે નદીઓ ઉફાણે આવતા પાણીના સ્તરે તમામ ખતરાના નિશાન પાર કરી દીધા છે. ખાસ કરીને બોઆને (Boane) જિલ્લામાં સ્થિતિ સૌથી વધુ કફોડી છે. અહીં રસ્તાઓ નદીમાં ફેરવાઈ ગયા છે અને લોકોના ઘર છાપરા સુધી ડૂબી ગયા છે. સેટેલાઇટ તસવીરો અને સ્થાનિક વિડિયોમાં જોઈ શકાય છે કે આખેઆખા સમુદાયો પાણીમાં ગરકાવ થઈ ગયા છે. સ્થાનિક સત્તાવાળાઓએ હાઈ-ફ્લડ વોર્નિંગ જાહેર કરી છે.
બચાવ કાર્ય અને વૈશ્વિક અપીલ
સરકાર દ્વારા રાહત અને બચાવ કામગીરી તેજ કરવામાં આવી છે. બોટ અને હેલિકોપ્ટર દ્વારા ફસાયેલા લોકોને બહાર કાઢવામાં આવી રહ્યા છે. જોકે, સતત ચાલુ રહેલા વરસાદ અને નબળા નેટવર્કને કારણે બચાવ ટુકડીઓને ભારે મુશ્કેલીનો સામનો કરવો પડી રહ્યો છે. પીવાના પાણી અને ખોરાકની ભારે તંગી સર્જાઈ છે, જેના કારણે રોગચાળો ફાટી નીકળવાની ભીતિ પણ સેવાઈ રહી છે.
મોઝામ્બિકમાં પૂરના કારણે સર્જાયેલી આ માનવીય કટોકટીમાં આંતરરાષ્ટ્રીય સમુદાય મદદ માટે આગળ આવે તેવી અપેક્ષા રાખવામાં આવી રહી છે.