કોલકાતા:પશ્ચિમ બંગાળના રાજકારણમાં ભારે ચર્ચા જગાવનાર I-PAC રેડ મામલે કલકત્તા હાઈકોર્ટે આજે એક મહત્વપૂર્ણ વળાંક આપતા તૃણમૂલ કોંગ્રેસ (TMC) ની અરજીનો નિકાલ કર્યો છે. એન્ફોર્સમેન્ટ ડિરેક્ટોરેટ (ED) એ કોર્ટમાં સત્તાવાર નિવેદન આપ્યું છે કે ૮ જાન્યુઆરીના રોજ રાજકીય સલાહકાર કંપની I-PAC ના ઓફિસ અને ડિરેક્ટર પ્રતીક જૈનના નિવાસસ્થાને કરવામાં આવેલી તપાસ દરમિયાન કોઈ પણ પ્રકારના દસ્તાવેજો, ડિજિટલ ડેટા કે સામગ્રી જપ્ત કરવામાં આવી નથી.
તૃણમૂલ કોંગ્રેસ વતી એવી દલીલ કરવામાં આવી હતી કે તેમને આશંકા છે કે ED દ્વારા છેલ્લા છ વર્ષનો રાજકીય અને સંવેદનશીલ ડેટા લેવામાં આવ્યો હોઈ શકે છે. ટીએમસીએ માત્ર એટલી જ રાહત માંગી હતી કે જો કોઈ ડેટા લેવામાં આવ્યો હોય તો તેની સુરક્ષા સુનિશ્ચિત કરવામાં આવે. જોકે, ED એ સ્પષ્ટ કર્યું કે કોઈ પણ રેકોર્ડ જપ્ત કરાયો નથી કે કોઈ ડેટાનો બેકઅપ લેવાયો નથી. હાઈકોર્ટે પંચનામા રિપોર્ટને આધારે આ નિવેદનને રેકોર્ડ પર લીધું અને જણાવ્યું કે હવે આ અરજીમાં કશું બાકી રહેતું નથી.
આ મામલો માત્ર હાઈકોર્ટ પૂરતો સીમિત રહ્યો નથી. કલકત્તા હાઈકોર્ટે નોંધ્યું છે કે આ સમાન વિષય પર સુપ્રીમ કોર્ટમાં પણ સુનાવણી પડતર છે. ED એ સુપ્રીમ કોર્ટમાં સ્પેશિયલ લીવ પિટિશન (SLP) દાખલ કરી છે, જેની સુનાવણી ગુરુવારે જસ્ટિસ પ્રશાંત કુમાર મિશ્રા અને જસ્ટિસ વિપુલ એમ. પંચોલીની બેંચ સમક્ષ થશે. પશ્ચિમ બંગાળ સરકારે આ મામલે પહેલાથી જ કેવિએટ દાખલ કરી દીધી છે, જેથી રાજ્યનો પક્ષ સાંભળ્યા વગર કોઈ આદેશ ન અપાય.
 ૮ જાન્યુઆરીએ કોલસા કૌભાંડના મની લોન્ડરિંગ કેસમાં ED એ I-PAC ના ઠેકાણાઓ પર દરોડા પાડ્યા હતા. ED નો આરોપ છે કે દરોડા દરમિયાન મુખ્યમંત્રી મમતા બેનર્જી પોતે ત્યાં પહોંચ્યા હતા અને મહત્વના દસ્તાવેજો તેમજ ઈલેક્ટ્રોનિક ઉપકરણો ત્યાંથી હટાવ્યા હતા. બીજી તરફ, મમતા બેનર્જીએ આ આરોપોને પાયાવિહોણા ગણાવ્યા છે અને એજન્સી પર સત્તાના દુરુપયોગનો આક્ષેપ કર્યો છે. હવે આ કાનૂની ખેંચતાણનો અંતિમ ફેંસલો સુપ્રીમ કોર્ટના હાથમાં છે.