લંડન:વર્ષ ૨૦૨૬ માટે જાહેર થયેલા પ્રતિષ્ઠિત 'હેનલી પાસપોર્ટ ઇન્ડેક્સ' (Henley Passport Index) માં ભારતીય પ્રવાસીઓ માટે ખુશખબર સામે આવી છે. વૈશ્વિક ગતિશીલતાના આ લિસ્ટમાં ભારતનો પાસપોર્ટ પાંચ સ્થાનના સુધારા સાથે ૮૦માં ક્રમે પહોંચી ગયો છે. આ રેન્કિંગમાં થયેલો સુધારો એ વાતની સાબિતી છે કે ભારતીય નાગરિકોની સ્વીકાર્યતા વૈશ્વિક સ્તરે વધી રહી છે. હવે ભારતીય પાસપોર્ટ ધારકો વિશ્વના ૫૫ દેશોમાં વિઝા વગર અથવા 'વિઝા-ઓન-અરાઇવલ' ની સુવિધા સાથે મુસાફરી કરી શકશે.
એશિયાનો દબદબો: સિંગાપોર ફરી ટોચ પર
વિશ્વના સૌથી શક્તિશાળી પાસપોર્ટની યાદીમાં એશિયાઈ દેશોએ ફરી એકવાર પોતાનું પ્રભુત્વ સાબિત કર્યું છે. સિંગાપોર સતત તેના ટોચના સ્થાન પર યથાવત છે, જેના નાગરિકો ૧૯૨ દેશોમાં પૂર્વ વિઝા વગર પ્રવેશી શકે છે. જાપાન અને દક્ષિણ કોરિયા સંયુક્ત રીતે બીજા ક્રમે રહ્યા છે. આ વર્ષના લિસ્ટમાં સૌથી મોટું આશ્ચર્ય સંયુક્ત આરબ અમીરાત (UAE) એ સર્જ્યું છે, જે ઝડપથી પ્રગતિ કરીને પાંચમા ક્રમે પહોંચી ગયું છે.
ભારતીયો ક્યાં ક્યાં ફરી શકશે?
ભારતનો રેન્ક સુધરવાથી હવે આફ્રિકા, એશિયા અને કેરેબિયન દેશોમાં પ્રવાસ કરવો વધુ આસાન બન્યો છે. ભારતીય પ્રવાસીઓ માટે લોકપ્રિય એવા થાઇલેન્ડ, મલેશિયા, મોરેશિયસ અને નેપાળ જેવા દેશોમાં હવે વિઝાની ઝંઝટ રહી નથી. આ ઉપરાંત માલદીવ્સ, શ્રીલંકા, ઇન્ડોનેશિયા અને કેન્યા જેવા દેશોમાં ભારતીયોને 'વિઝા-ઓન-અરાઇવલ' અથવા ઇલેક્ટ્રોનિક ટ્રાવેલ ઓથોરાઇઝેશન (ETA) ની સુવિધા મળે છે.
ટોપ-૧૦માં પશ્ચિમી દેશોનું સ્થાન
ઇન્ડેક્સ મુજબ, યુરોપિયન દેશો જેવા કે ડેનમાર્ક, લક્ઝમબર્ગ અને સ્પેન ત્રીજા ક્રમે છે. જ્યારે આર્થિક મહાસત્તા ગણાતા અમેરિકાનો પાસપોર્ટ ૧૭૯ દેશોની એક્સેસ સાથે ૧૦મા ક્રમે છે. નિષ્ણાતોના મતે, કોઈપણ દેશનો પાસપોર્ટ કેટલો મજબૂત છે તે તે દેશના આર્થિક સંબંધો અને રાજદ્વારી વ્યૂહરચના પર નિર્ભર કરે છે. ભારત જે રીતે આ યાદીમાં આગળ વધી રહ્યું છે તે જોતા આગામી વર્ષોમાં ભારતીયો માટે વધુ દેશોના દ્વાર ખુલે તેવી શક્યતા છે.