દુબઈ:વિશ્વના સૌથી અત્યાધુનિક શહેરોમાં જેની ગણના થાય છે તે દુબઈ હવે પરિવહન ક્ષેત્રે એક નવી ઊંચાઈ સર કરવા જઈ રહ્યું છે. દુબઈની રોડ્સ એન્ડ ટ્રાન્સપોર્ટ ઓથોરિટી (RTA) એ જાહેરાત કરી છે કે ૨૦૨૬ના પ્રથમ ત્રિમાસિક ગાળાથી શહેરમાં વ્યાપારી ધોરણે 'ડ્રાઇવરલેસ રોબોટેક્સી' સેવા શરૂ કરવામાં આવશે. આ પ્રોજેક્ટના પ્રથમ તબક્કામાં શહેરના ૬૫ મહત્વના સ્થળોને આવરી લેવામાં આવશે, જે દુબઈને સ્વાયત્ત વાહન (Autonomous Vehicle) ટેકનોલોજીમાં વિશ્વનું અગ્રણી કેન્દ્ર બનાવશે.
બે ઝોનમાં વહેંચાયેલું નેટવર્ક
આ મહત્વાકાંક્ષી પ્રોજેક્ટને બે ઝોનમાં વહેંચવામાં આવ્યો છે. ઝોન વનમાં ૧૭ અને ઝોન ટુ માં ૪૮ સ્થાનો સહિત કુલ ૬૫ સ્થળોએ આ ટેક્સીઓ દોડશે. આ માટે દુબઈના જાહેર રસ્તાઓનું અત્યંત ચોકસાઈપૂર્વકનું મેપિંગ પૂર્ણ કરી લેવામાં આવ્યું છે. દુબઈ સાયન્સ પાર્ક ખાતે સ્થાપિત કરવામાં આવેલું હાઈ-ટેક કંટ્રોલ સેન્ટર આ વાહનોનું રીઅલ-ટાઇમ મોનિટરિંગ, ચાર્જિંગ અને સોફ્ટવેર અપડેટ્સ જેવી બાબતોનું સંચાલન કરશે.
Baidu Apollo Go સાથે ભાગીદારી
દુબઈએ આ સેવા માટે ચીની ટેક દિગ્ગજ કંપની 'Baidu Apollo Go' સાથે કરાર કર્યો છે. ચીન બહાર આ કંપનીનું આ પ્રથમ ઓપરેશનલ સેન્ટર છે. RTA એ સેફ્ટી ડ્રાઇવર વગર જ ટ્રાયલ રન કરવા માટેની પરમિટ પણ જારી કરી દીધી છે. નોંધનીય છે કે ઓગસ્ટ ૨૦૨૫ માં ૫૦ જેટલા 'RT6' સ્વાયત્ત વાહનોનું દુબઈ સિલિકોન ઓએસિસ અને જુમેરાહ જેવા પોશ વિસ્તારોમાં સફળ પરીક્ષણ કરવામાં આવ્યું હતું.
ભવિષ્યનું લક્ષ્ય: ૧,૦૦૦ રોબોટેક્સી
દુબઈ સરકારનું લક્ષ્ય માત્ર શરૂઆત પૂરતું મર્યાદિત નથી. આગામી વર્ષોમાં આ કાફલાને વધારીને ૧,૦૦૦થી વધુ રોબોટેક્સી સુધી લઈ જવાની યોજના છે. આ પહેલથી મુસાફરોને વધુ સુરક્ષિત, ઝડપી અને સસ્તી પરિવહન સુવિધા મળશે. જો ટ્રાયલ અને અંતિમ નિયમનકારી મંજૂરીઓ સમયસર મળી જશે, તો ૨૦૨૬ ના માર્ચ મહિના સુધીમાં દુબઈના રહેવાસીઓ અને પ્રવાસીઓ કોઈપણ ડ્રાઇવર વગરની ટેક્સીમાં સવારી કરવાનો રોમાંચ માણી શકશે.