રિયાધ: ભારત અને સાઉદી અરેબિયા વચ્ચેના સંબંધોમાં એક નવો અધ્યાય ઉમેરાયો છે. ભારતની અગ્રણી એરલાઇન 'એર ઇન્ડિયા' અને સાઉદી અરેબિયાની રાષ્ટ્રીય કેરિયર 'સાઉદીયા' (Saudia) એ વ્યૂહાત્મક 'કોડશેર' કરાર પર હસ્તાક્ષર કર્યા છે. ફેબ્રુઆરી ૨૦૨૬ થી અમલમાં આવનારી આ ભાગીદારીને કારણે બંને દેશો વચ્ચે હવાઈ જોડાણ (Connectivity) અભૂતપૂર્વ રીતે મજબૂત બનશે. હવે મુસાફરો સિંગલ ટિકિટ બુકિંગ દ્વારા ભારત અને સાઉદીના અનેક નાના-મોટા શહેરો સુધી સરળતાથી પહોંચી શકશે.
મુસાફરો માટે શું બદલાશે?
આ કરાર અંતર્ગત, એર ઇન્ડિયા અને સાઉદીયાના મુસાફરોને 'સીમલેસ ટ્રાવેલ'નો અનુભવ મળશે. જેનો અર્થ છે કે મુસાફરોએ કનેક્ટિંગ ફ્લાઇટ માટે અલગ ટિકિટ લેવી પડશે નહીં. ઉપરાંત, તમારો સામાન ચેક-ઇન કર્યા પછી સીધો જ અંતિમ મુકામ (Final Destination) પર મળશે. સાઉદીયાના મુસાફરો હવે મુંબઈ અને દિલ્હીના માધ્યમથી અમદાવાદ, બેંગલુરુ, કોચી, હૈદરાબાદ અને લખનૌ જેવા ૧૫થી વધુ ભારતીય શહેરો સાથે સીધા જોડાઈ શકશે.
પ્રવાસન અને ડાયસ્પોરા માટે સુવર્ણ તક
સાઉદી અરેબિયામાં વસતા લાખો ભારતીયો માટે આ સમાચાર ખૂબ જ આનંદદાયક છે. એર ઇન્ડિયાના મુસાફરો હવે જેદ્દાહ કે રિયાધથી આગળ વધીને દમ્મામ, આભા, મદીના અને તૈફ જેવા સાઉદીના આંતરિક શહેરો સુધી સાઉદીયાની ફ્લાઇટ્સનો ઉપયોગ કરી શકશે. એર ઇન્ડિયાના સીઈઓ કેમ્પબેલ વિલ્સને જણાવ્યું હતું કે, સાઉદી અરેબિયા ઝડપથી વૈશ્વિક પ્રવેશદ્વાર બની રહ્યું છે, અને આ ભાગીદારીથી ભારતીય પર્યટકો માટે સાઉદીના જોવાલાયક સ્થળોના દ્વાર ખુલશે.
વિઝા પ્રક્રિયામાં પણ સરળતા
સાઉદીયા ગ્રુપના ડિરેક્ટર જનરલ ઇબ્રાહિમ અલ-ઓમારે આ તકે જણાવ્યું કે ભારત સાથે અમારો સંબંધ ૬૦ વર્ષ જૂનો છે. હાલમાં ભારતીય પાસપોર્ટ ધારકો માટે ઈ-વિઝા અને વિઝા-ઓન-અરાઈવલ જેવી સુવિધાઓ ઉપલબ્ધ છે, ત્યારે આ નવો કરાર મુસાફરીના અનુભવને વધુ આરામદાયક બનાવશે. ટાટા ગ્રુપના નેજા હેઠળ આવ્યા પછી એર ઇન્ડિયાએ વિશ્વભરમાં જે ૨૪થી વધુ કોડશેર કરારો કર્યા છે, તેમાં સાઉદીયા સાથેની આ ભાગીદારી મધ્ય-પૂર્વના બજાર માટે ગેમ-ચેન્જર સાબિત થઈ શકે છે.