રાજકોટ: તા.૧૪: ક્રિકેટના મેદાન પર રનનો પહાડ ખડકનાર વિરાટ કોહલી માત્ર તેના બેટિંગ કૌશલ્ય માટે જ નહીં, પણ તેના ચાહકો પ્રત્યેના ઉષ્માભર્યા વ્યવહાર માટે પણ જાણીતો છે. ભારત અને ન્યુઝીલેન્ડ વચ્ચેની વનડે શ્રેણી દરમિયાન એક એવી ઘટના બની જેણે કરોડો ક્રિકેટ પ્રેમીઓના દિલ જીતી લીધા છે. હરિયાણાના પંચકુલાનો રહેવાસી ૮ વર્ષનો ગર્વિત ઉત્તમ, જે અદ્દલ વિરાટ કોહલી જેવો દેખાય છે, તેને મળ્યા બાદ ખુદ વિરાટ પણ આશ્ચર્યચકિત થઈ ગયો હતો.
"ઓયે જો, મારો ડુપ્લિકેટ બેઠો છે"
નાનકડા ગર્વિતે વિરાટ સાથેની તેની મુલાકાતનો રોમાંચક અનુભવ શેર કરતા જણાવ્યું કે, જ્યારે તેણે વિરાટનું નામ લીધું, ત્યારે કિંગ કોહલીએ તેની તરફ જોયું અને સ્મિત સાથે કહ્યું, "થોડી વારમાં આવું છું." ત્યાર બાદ વિરાટે કેપ્ટન રોહિત શર્માને પણ પાસે બોલાવ્યો અને ગર્વિત તરફ ઈશારો કરતા મજાકમાં કહ્યું, "ઓયે ઉધર દેખ મેરા ડુપ્લિકેટ બેઠા હૈ!" વિરાટે પ્રેમથી આ બાળકને "છોટા ચીકુ" કહીને બોલાવ્યો હતો, જે વિરાટનું પોતાનું લાડકું નામ છે.
કોણ છે આ 'છોટા ચીકુ'?
હરિયાણાના પંચકુલાના સેક્ટર-૧૧માં રહેતો ગર્વિત માત્ર દેખાવમાં જ વિરાટ જેવો નથી, પણ તેને ક્રિકેટ અને અભિનયનો પણ જબરો શોખ છે. તેના પિતા સુરેન્દ્ર સિંહ હિમાચલ પ્રદેશમાં કાર્યરત છે. ગર્વિતની તસવીરો સોશિયલ મીડિયા પર વાયરલ થયા બાદ લોકો તેને કોહલીનું બાળપણનું સંસ્કરણ કહી રહ્યા છે. ૧,૨૦૦ કિલોમીટર દૂરથી આવેલા આ નાનકડા ચાહકના ઉત્સાહને જોઈને ખુદ કોહલીએ પણ તેને ખાસ સમય આપ્યો હતો.
મેદાન પર કોહલીનો 'વિરાટ' રેકોર્ડ
એક તરફ 'છોટા ચીકુ' ચર્ચામાં છે, તો બીજી તરફ મેદાન પર અસલી 'ચીકુ' એટલે કે વિરાટ કોહલી રેકોર્ડ્સ તોડી રહ્યો છે. ન્યુઝીલેન્ડ સામેની પ્રથમ વનડેમાં ૯૩ રનની શાનદાર ઇનિંગ રમીને કોહલીએ સચિન તેંડુલકરનો સૌથી ઝડપી ૨૮,૦૦૦ આંતરરાષ્ટ્રીય રન બનાવવાનો રેકોર્ડ તોડી નાખ્યો છે. આજે રાજકોટમાં રમાયેલી બીજી વનડેમાં પણ કોહલીએ ન્યુઝીલેન્ડ સામે સૌથી વધુ રન બનાવનાર ભારતીય બેટ્સમેન બનવાનું ગૌરવ હાંસલ કર્યું છે.
વિરાટ હવે વનડે ક્રિકેટમાં ૧૫,૦૦૦ રનના જાદુઈ આંકડાની અત્યંત નજીક છે, જે અત્યાર સુધી માત્ર સચિન તેંડુલકર જ કરી શક્યા છે. ૨૦૨૬ની શરૂઆતમાં કોહલીનું આ ફોર્મ જોઈને ચાહકોમાં ભારે ઉત્સાહ છે.