મિનીએપોલિસ  : અમેરિકાના મિનીએપોલિસમાં ઇમિગ્રેશન એન્ડ કસ્ટમ્સ એન્ફોર્સમેન્ટ (ICE) ના એજન્ટ દ્વારા એક અમેરિકન મહિલાની ગોળી મારીને હત્યા કરવામાં આવ્યા બાદ સમગ્ર દેશમાં ભારેલા અગ્નિ જેવી સ્થિતિ સર્જાઈ છે. શનિવારે (૧૦ જાન્યુઆરી, ૨૦૨૬) અમેરિકાના અનેક મોટા શહેરો અને નાના નગરોમાં હજારો પ્રદર્શનકારીઓ રસ્તા પર ઉતરી આવ્યા હતા અને ટ્રમ્પ વહીવટીતંત્રના કડક ઇમિગ્રેશન કાયદાઓ તથા સુરક્ષા એજન્સીઓની અતિશયતા સામે ઉગ્ર વિરોધ નોંધાવ્યો હતો.
ઘટનાની વિગત અને વિવાદ:
આ વિવાદના મૂળમાં ત્રણ દિવસ પહેલા મિનીએપોલિસમાં બનેલી ઘટના છે, જ્યાં એક ICE એજન્ટે કાર ચલાવી રહેલી અમેરિકન નાગરિક રેની નિકોલ ગુડ પર ગોળીબાર કરી તેની હત્યા કરી દીધી હતી. આ ઘટનાના વીડિયો ફૂટેજ સોશિયલ મીડિયા પર વાયરલ થયા છે, જેના કારણે દેશ બે પક્ષોમાં વહેંચાઈ ગયો છે. મિનેસોટાના નેતાઓએ આ ઘટનાને નિર્દોષ નાગરિક પર બિનજરૂરી બળપ્રયોગ ગણાવ્યો છે, જ્યારે ટ્રમ્પ વહીવટીતંત્રના અધિકારીઓએ દાવો કર્યો છે કે રેની નિકોલ એક 'ડાબેરી ઘરેલું આતંકવાદી' હતી અને તેણે એજન્ટ પર કાર ચઢાવવાનો પ્રયાસ કર્યો હતો, જેના જવાબમાં એજન્ટે સ્વબચાવમાં ગોળી ચલાવી હતી.
'રેઈન ઓફ ટેરર' સામે દેશવ્યાપી આંદોલન:
મિનીએપોલિસની હત્યા અને પોર્ટલેન્ડમાં બોર્ડર પેટ્રોલ એજન્ટો દ્વારા બે વ્યક્તિઓ પર કરાયેલા ગોળીબારના વિરોધમાં 'નો કિંગ્સ', 'હેન્ડ્સ ઓફ' અને '50501 મૂવમેન્ટ' જેવા સંગઠનોએ દેશવ્યાપી એકત્રીકરણની હાકલ કરી હતી. આંદોલનકારીઓએ જણાવ્યું હતું કે, "રેની નિકોલ અને પોર્ટલેન્ડના પીડિતો એ ICE ના ત્રાસના તાજેતરના ઉદાહરણો છે. ટ્રમ્પ શાસન હેઠળ સુરક્ષા દળોની હિંસામાં તીવ્ર વધારો થયો છે."
નિશાન પર ઇમિગ્રન્ટ્સ સમુદાય:
ટ્રમ્પ પ્રશાસન દ્વારા એક પછી એક શહેરમાં મોટા પાયે એન્ફોર્સમેન્ટ ઓપરેશન્સ ચલાવવામાં આવી રહ્યા છે. મિનીએપોલિસમાં ખાસ કરીને સોમાલી ઇમિગ્રન્ટ્સને નિશાન બનાવવામાં આવી રહ્યા હોવાના આક્ષેપો ઉઠ્યા છે. ફેડરલ એજન્ટો જ્યારે રહેણાંક વિસ્તારોમાં દરોડા પાડે છે ત્યારે સ્થાનિક લોકો કેમેરા અને વ્હિસલ સાથે તેમનો વિરોધ કરી રહ્યા છે. શનિવારે પોર્ટલેન્ડમાં પણ વોટરફ્રન્ટ પાસે મોટી સંખ્યામાં લોકો એકઠા થયા હતા અને 'આઈસ આઉટ ફોર ગુડ' કેમ્પેઈન હેઠળ સૂત્રોચ્ચાર કર્યા હતા.
હાલમાં અમેરિકાના અનેક શહેરોમાં સુરક્ષા વ્યવસ્થા ચુસ્ત કરી દેવામાં આવી છે અને માનવ અધિકાર સંગઠનો આ મામલે નિષ્પક્ષ તપાસની માંગ કરી રહ્યા છે.