મિસિસિપી:અમેરિકામાં ગન કલ્ચરનો ભયાનક ચહેરો ફરી એકવાર સામે આવ્યો છે. ઉત્તરપૂર્વી મિસિસિપીની શાંત ગણાતી ક્લે કાઉન્ટીમાં આજે સવારના સમયે એક શંકાસ્પદ બંદૂકધારીએ આતંક મચાવ્યો હતો. હુમલાખોરે એક કે બે નહીં, પણ ત્રણ અલગ-અલગ સ્થળોએ જઈને અંધાધૂંધ ગોળીબાર કર્યો હતો. આ લોહિયાળ ઘટનામાં અત્યાર સુધીમાં 6 લોકોના કરુણ મોત થયા હોવાની પુષ્ટિ મળી છે. અચાનક થયેલા આ હુમલાથી સ્થાનિક લોકોમાં ભારે નાસભાગ મચી ગઈ હતી અને સમગ્ર વિસ્તાર પોલીસ છાવણીમાં ફેરવાઈ ગયો હતો.

ઘટનાની જાણ થતા જ ક્લે કાઉન્ટીના શેરિફ એડી સ્કોટે પોલીસ ફોર્સ સાથે મોરચો સંભાળ્યો હતો. લાંબી જહેમત અને પીછો કર્યા બાદ આખરે શંકાસ્પદ હત્યારાને જીવતો પકડી લેવામાં આવ્યો છે. શેરિફ સ્કોટે સોશિયલ મીડિયા પર પોસ્ટ કરીને રાહતના સમાચાર આપ્યા હતા કે હવે આ શખ્સ પોલીસની કસ્ટડીમાં છે અને સમુદાય માટે કોઈ મોટો ખતરો રહ્યો નથી. જોકે, આ શખ્સે કયા કારણોસર આટલી ક્રૂરતા આચરી અને તેની પાછળનો હેતુ શું હતો, તે અંગે હજુ સુધી કોઈ સત્તાવાર ખુલાસો કરવામાં આવ્યો નથી.

આશરે 20,000 ની વસ્તી ધરાવતી ક્લે કાઉન્ટી માટે આ ઘટના ક્યારેય ન ભૂલાય તેવો આઘાત છે. સ્થાનિક ન્યૂઝ ચેનલ WTVA ના અહેવાલ મુજબ, મૃતકોમાં સ્થાનિક રહીશોનો સમાવેશ થાય છે જેઓ આ અચાનક થયેલા હુમલાનો શિકાર બન્યા હતા. શેરિફ વિભાગ હાલમાં ત્રણેય ઘટનાસ્થળેથી પુરાવા એકત્ર કરી રહ્યો છે. સ્કોટે ફેસબુક પર ભાવુક પોસ્ટ લખતા જણાવ્યું કે, "હું વિનંતી કરું છું કે તમે અમારા પીડિતો અને તેમના પરિવારોને તમારી પ્રાર્થનામાં રાખો." આ નિવેદન દર્શાવે છે કે પરિસ્થિતિ કેટલી ગંભીર અને હૃદયદ્રાવક છે.

અમેરિકામાં ગોળીબારની વધતી જતી ઘટનાઓએ ફરી એકવાર હથિયારોના કાયદા પર ચર્ચા છેડી દીધી છે. મિસિસિપીની આ ઘટનાએ સાબિત કર્યું છે કે નાના શહેરો પણ હવે આ હિંસાથી સુરક્ષિત રહ્યા નથી. પોલીસ હાલમાં આરોપીની પૂછપરછ કરી રહી છે જેથી જાણી શકાય કે આ કોઈ વ્યક્તિગત અદાવત હતી કે પછી માનસિક વિકૃતિનું પરિણામ. ઘટના બાદ વિસ્તારમાં શોકનું મોજું ફરી વળ્યું છે અને વહીવટીતંત્ર દ્વારા મૃતકોની ઓળખ કરવાની પ્રક્રિયા હાથ ધરવામાં આવી છે.