ઈસ્લામાબાદ: પાકિસ્તાન અને આતંકવાદનો અતૂટ સંબંધ ફરી એકવાર આંતરરાષ્ટ્રીય મંચ પર ખુલ્લો પડી ગયો છે. લશ્કર-એ-તૈયબાના ડેપ્યુટી ચીફ અને નિર્દોષોના લોહીથી જેમના હાથ ખરડાયેલા છે તેવા ખુંખાર આતંકી સૈફુલ્લાહ કસૂરીનો એક વિવાદાસ્પદ વીડિયો સામે આવ્યો છે. આ વીડિયોમાં કસૂરી પાકિસ્તાની સેના અને આતંકી સંગઠનો વચ્ચેના મધુર સંબંધોની પોલ ખોલી રહ્યો છે. તેણે દાવો કર્યો છે કે પાકિસ્તાની સેના તેને એટલું સન્માન આપે છે કે તેમના સૈનિકોના અંતિમ સંસ્કારમાં નમાજ પઢાવવા માટે ખાસ આમંત્રણ આપવામાં આવે છે. આ કબૂલાતથી સાબિત થાય છે કે પાકિસ્તાનમાં આતંકવાદ કોઈ છૂપી પ્રવૃત્તિ નથી, પરંતુ રાજ્ય પ્રાયોજિત વ્યવસાય છે.
સૌથી વધુ ચિંતાજનક અને શરમજનક બાબત એ છે કે આ આતંકવાદી નેતા એક શાળામાં માસૂમ બાળકોને સંબોધન કરી રહ્યો હતો. જે ઉંમરે બાળકોના હાથમાં કલમ અને પુસ્તકો હોવા જોઈએ, તે ઉંમરે આતંકી સૈફુલ્લાહ તેમના મગજમાં ભારત પ્રત્યે નફરત અને હિંસાના બીજ વાવી રહ્યો હતો. તેણે બાળકો સામે બડાશ હાંકતા કહ્યું કે, "શું તમે જાણો છો કે ભારત પણ મારા નામથી ડરે છે?" એક શાળાના પ્લેટફોર્મ પરથી આ પ્રકારનું ઉશ્કેરણીજનક ભાષણ પાકિસ્તાનની શૈક્ષણિક સંસ્થાઓમાં આતંકી વિચારધારા કેટલી હદે ઘૂસી ગઈ છે તેનું જીવતું જાગતું ઉદાહરણ પૂરું પાડે છે.
સૈફુલ્લાહ કસૂરી એ જ આતંકી છે જે એપ્રિલ 2025માં થયેલા પહેલગામ હુમલાનો મુખ્ય સૂત્રધાર હતો, જેમાં 26 જેટલા નિર્દોષ પ્રવાસીઓની ઘાતકી હત્યા કરવામાં આવી હતી. ભારતના ગુપ્તચર સૂત્રોએ આ વીડિયોની સત્યતાની પુષ્ટિ કરી છે, જે પાકિસ્તાન દ્વારા આતંકવાદને મળતા ખુલ્લા સમર્થનના મજબૂત પુરાવા તરીકે જોવામાં આવે છે. લશ્કર-એ-તૈયબા અગાઉ 1999ના કારગિલ યુદ્ધમાં પણ પાકિસ્તાની સેનાના ખભાથી ખભા મિલાવીને ભારત સામે લડ્યું હતું. આ વીડિયો સામે આવ્યા બાદ વિશ્વના અન્ય દેશોમાં પણ પાકિસ્તાનની આકરી ટીકા થઈ રહી છે અને તેના પર આંતરરાષ્ટ્રીય પ્રતિબંધોની માંગ તેજ બની છે.
બીજી તરફ, ભારત સરકારે આ વીડિયો અને આતંકીઓની નવી હિલચાલને ગંભીર ચેતવણી ગણાવી છે. પહેલગામ હુમલાના વળતા જવાબમાં ભારતીય સેનાએ 'ઓપરેશન સિંદૂર' દ્વારા આતંકીઓના અનેક ઠેકાણાઓ ધ્વસ્ત કર્યા હતા, પરંતુ લશ્કર અને જૈશ-એ-મોહમ્મદ જેવા સંગઠનો ફરીથી જમ્મુ-કાશ્મીરમાં રક્તપાત કરવાની ફિરાકમાં હોવાના અહેવાલ છે. ભારતની સુરક્ષા એજન્સીઓ હાલ હાઈ એલર્ટ પર છે. જો પાકિસ્તાન આ રીતે આતંકવાદીઓને પ્રોત્સાહન આપવાનું ચાલુ રાખશે, તો ભારતે ફરી એકવાર 'સર્જિકલ સ્ટ્રાઈક' જેવો જડબાતોડ જવાબ આપવો પડી શકે છે તેવી સ્થિતિ સર્જાઈ રહી છે.