સોમનાથ: ભારતના પવિત્ર જ્યોતિર્લિંગ એવા સોમનાથ મહાદેવના સાનિધ્યમાં આજે વડાપ્રધાન નરેન્દ્ર મોદીના હસ્તે એક નવો ઇતિહાસ રચાયો છે. ગુજરાત પ્રવાસના બીજા દિવસે વડાપ્રધાને સોમનાથના રક્ષણ કાજે પ્રાણોની આહુતિ આપનારા વીરોની સ્મૃતિમાં આયોજિત 'શૌર્ય યાત્રા'માં સહભાગી થઈને સૌને મંત્રમુગ્ધ કરી દીધા હતા. આ યાત્રામાં હિંમત અને બલિદાનના પ્રતીક સમાન 108 શક્તિશાળી અશ્વોના કાફલાએ સમગ્ર વાતાવરણને શૌર્યથી ભરી દીધું હતું. શંખ સર્કલથી હમીરજી ગોહિલની પ્રતિમા સુધીના બે કિલોમીટર લાંબા માર્ગ પર જનમેદનીનું અભિવાદન ઝીલતા વડાપ્રધાને ભારતીય સંસ્કૃતિ અને સ્વાભિમાનનો જયઘોષ કર્યો હતો.
શૌર્ય યાત્રાના ભવ્ય સમાપન બાદ વડાપ્રધાન મોદીએ સોમનાથ મહાદેવના ગર્ભગૃહમાં વિધિવત પૂજા-અર્ચના, જળાભિષેક અને શાસ્ત્રોક્ત વિધિ દ્વારા મહાદેવના આશીર્વાદ લીધા હતા. આ પ્રસંગે તેમની સાથે મુખ્યમંત્રી ભૂપેન્દ્ર પટેલ અને ગૃહ રાજ્યમંત્રી હર્ષ સંઘવી પણ ઉપસ્થિત રહ્યા હતા. સોમનાથના સમુદ્ર કિનારેથી 'સ્વાભિમાન પર્વ' અંતર્ગત એક વિશાળ જનસભાને સંબોધતા પીએમ મોદીએ જણાવ્યું હતું કે, સોમનાથ માત્ર એક મંદિર નથી, પરંતુ ભારતની અજેય આસ્થા અને પુનરુત્થાનનું પ્રતીક છે. આ યાત્રા એ શહીદોને સાચી અંજલિ છે જેમણે સદીઓ સુધી આ પવિત્ર ધામની રક્ષા માટે લોહી વહાવ્યું છે.
સોમનાથનો કાર્યક્રમ પૂર્ણ કરી પીએમ મોદી મધ્યાહ્ન બાદ સૌરાષ્ટ્રના આર્થિક પાટનગર રાજકોટ પહોંચ્યા હતા. રાજકોટના ઔદ્યોગિક હબમાં તેમણે 'વાઇબ્રન્ટ ગુજરાત રીજનલ કોન્ફરન્સ'નું ભવ્ય ઉદ્ઘાટન કર્યું હતું. આ કોન્ફરન્સ દ્વારા સૌરાષ્ટ્રના ઉદ્યોગોને વૈશ્વિક સ્તરે નવી ઓળખ અપાવવાનો લક્ષ્‍ય રાખવામાં આવ્યો છે. પીએમ મોદીના આગમનથી રાજકોટના ઉદ્યોગપતિઓ અને યુવા સાહસિકોમાં ભારે ઉત્સાહ જોવા મળ્યો હતો. વિકાસની આ ગતિ સોમનાથની આધ્યાત્મિકતા સાથે જોડાતા ગુજરાતના સર્વાંગી વિકાસની એક નવી તસવીર ઉપસી રહી છે.
વ્યસ્ત કાર્યક્રમના અંતિમ ચરણમાં વડાપ્રધાન સાંજે ગાંધીનગર પહોંચશે, જ્યાં તેઓ મેટ્રો ટ્રેન પ્રોજેક્ટના ફેઝ-2નું લોકાર્પણ કરીને ગાંધીનગર અને અમદાવાદની કનેક્ટિવિટીને વધુ મજબૂત બનાવશે. મહાત્મા મંદિર મેટ્રો સ્ટેશનનું ઉદ્ઘાટન કર્યા બાદ પીએમ મોદી ગાંધીનગર રાજભવન ખાતે રાત્રિ રોકાણ કરશે. આમ, સોમનાથના દરિયા કિનારેથી શ્રદ્ધાનો દીવો પ્રગટાવી પીએમ મોદીએ રાજકોટના ઉદ્યોગો અને ગાંધીનગરની આધુનિક માળખાગત સુવિધાઓ સુધી ગુજરાતના વિકાસ મોડેલને વધુ વેગવંતુ બનાવ્યું છે.