દીવ, તા. 09 : સૌરાષ્ટ્રના પ્રવાસન ધામ દીવના ઘોઘલા બીચ ખાતે રમાઈ રહેલી 'ખેલો ઇન્ડિયા બીચ ગેમ્સ 2026' માં તમિલનાડુના ખેલાડીઓએ મેદાન મારી લીધું છે. ટૂર્નામેન્ટના ચોથા દિવસે તમિલનાડુએ શાનદાર પ્રદર્શન કરતા મહિલા બીચ વોલીબોલ અને પુરુષોના રેગુ પેનકેક સિલાટ (પરંપરાગત માર્શલ આર્ટ) માં સુવર્ણ પદક જીતીને મેડલ ટેલીમાં પ્રથમ ક્રમાંક હાસિલ કર્યો છે.
મેડલ જીતવાની હોડ અને રસાકસી
તમિલનાડુએ માત્ર ગોલ્ડ જ નહીં, પરંતુ કુલ ૨ ગોલ્ડ, ૨ સિલ્વર અને ૩ બ્રોન્ઝ મેડલ જીતીને પોતાની મજબૂત પકડ સાબિત કરી છે. બીજી તરફ, યજમાન દાદરા અને નગર હવેલી તથા દમણ અને દીવની ટીમ ૬ મેડલ સાથે બીજા સ્થાને રહી છે. બીચ વોલીબોલની પુરૂષોની કેટેગરીમાં ગોવાએ ગોલ્ડ જીતીને પોતાની તાકાત બતાવી હતી, જ્યારે મણિપુર અને ચંદીગઢ પણ ૫-૫ મેડલ સાથે લડત આપી રહ્યા છે.
ગુજરાતની ફાઇનલમાં એન્ટ્રી
સ્થાનિક પ્રેક્ષકો માટે સૌથી આનંદના સમાચાર બીચ સોકર (ફૂટબોલ) માંથી આવ્યા છે. મહિલા બીચ સોકરમાં ગુજરાતની ટીમે અદભૂત રમત રમીને ફાઇનલમાં પ્રવેશ મેળવી લીધો છે. હવે ગોલ્ડ મેડલ માટે ગુજરાતનો સામનો ડિફેન્ડિંગ ચેમ્પિયન ઓડિશા સામે થશે. આ રોમાંચક ફાઇનલ મેચ જોવા માટે મોટી સંખ્યામાં રમતપ્રેમીઓ ઉમટી પડે તેવી શક્યતા છે.
માર્શલ આર્ટ અને સેપકટકરાનો રોમાંચ
સેપકટકરા રમતની વાત કરીએ તો, હરિયાણાની મહિલા ટીમ અને દિલ્હીની પુરૂષ ટીમે ગોલ્ડ મેડલ જીતીને બિહારની ચેમ્પિયન બનવાની આશા પર પાણી ફેરવી દીધું હતું. ઉલ્લેખનીય છે કે આ ગેમ્સમાં ભારતભરના ૧,૧૦૦ થી વધુ ખેલાડીઓ ૮ અલગ-અલગ રમતોમાં ૩૨ ગોલ્ડ મેડલ માટે પરસેવો પાડી રહ્યા છે. દીવના બ્લુ ફ્લેગ બીચ પર ચાલી રહેલો આ ઉત્સવ ખેલાડીઓ અને પ્રવાસીઓ બંને માટે આકર્ષણનું કેન્દ્ર બન્યો છે.