સેન ફ્રાન્સિસ્કો: ઘણીવાર હોસ્પિટલના રિપોર્ટ્સમાં લખેલી જટિલ મેડિકલ ભાષા સામાન્ય માણસ માટે સમજવી લોઢાના ચણા ચાવવા જેવી હોય છે. ડૉક્ટર સમજાવે તો પણ થોડીવારમાં બધું ભૂલાઈ જતું હોય છે. આ સમસ્યાના ઉકેલ માટે હવે OpenAI એ એક ક્રાંતિકારી ડગલું ભર્યું છે. કંપનીએ ખાસ 'ChatGPT હેલ્થ' સુવિધાનું અનાવરણ કર્યું છે, જે જટિલ મેડિકલ ડેટા અને હેલ્થ રિપોર્ટ્સને સામાન્ય માણસ સમજી શકે તેવી સરળ ભાષામાં સમજાવશે.

કેવી રીતે કામ કરશે ChatGPT હેલ્થ?

માઈક્રોસોફ્ટ સમર્થિત OpenAI મુજબ, આ નવું ફીચર તમારી સ્માર્ટ વોચ, ફિટનેસ ટ્રેકર અને મેન્ટલ વેલનેસ એપ્સ સાથે સીધું લિંક થઈ જશે.

· રિપોર્ટ એનાલિસિસ: તે તમારા બ્લડ ટેસ્ટ કે અન્ય રિપોર્ટ્સને સ્કેન કરીને તેનું વિશ્લેષણ કરશે.

· ડૉક્ટર માટે તૈયારી: તે તમને ડૉક્ટર પાસે જતાં પહેલાં કયા પ્રશ્નો પૂછવા જોઈએ અને કઈ સાવચેતી રાખવી જોઈએ તે માટે તૈયાર કરશે.

· રોજિંદી પેટર્ન: તે માત્ર બીમારી સમયે જ નહીં, પણ તમારી ઊંઘ, આહાર અને વર્કઆઉટની પેટર્નને ટ્રેક કરીને લાંબા ગાળાની હેલ્થ એડવાઈઝ આપશે.

ગોપનીયતા અને સુરક્ષાનું ખાસ ધ્યાન:

આરોગ્ય સંબંધિત ડેટા અત્યંત સંવેદનશીલ હોવાથી, OpenAI એ 'ChatGPT હેલ્થ' ને મુખ્ય ચેટિંગ સેક્શનથી અલગ રાખ્યું છે. તમારી હેલ્થ ટ્રેકિંગ એપ્સ અને મેડિકલ ફાઇલો અન્ય સામાન્ય ચેટ્સ સાથે મિક્સ થશે નહીં. આ માટે કંપનીએ એક અલગ મેમરી સિસ્ટમ બનાવી છે જેથી યુઝરનો પ્રાઇવસી ડેટા સુરક્ષિત રહે.

ડૉક્ટરનો વિકલ્પ નહીં, પણ મદદગાર:

OpenAI એ સ્પષ્ટ ચેતવણી આપી છે કે, "ChatGPT હેલ્થ એ તબીબી સારવારને સપોર્ટ કરવા માટે છે, તેને બદલવા માટે નહીં." આ એપ કોઈપણ રોગનું નિદાન કે દવા લખવા માટે નથી, પરંતુ ડૉક્ટર અને દર્દી વચ્ચેના સંવાદને વધુ સ્પષ્ટ અને સરળ બનાવવા માટેનું એક માધ્યમ છે.

હાલમાં આ સુવિધા યુએસના પસંદગીના યુઝર્સ માટે ઉપલબ્ધ છે, જ્યારે ભારત સહિતના અન્ય દેશોના યુઝર્સ અત્યારથી જ તેની વેઇટલિસ્ટ માટે સાઇન અપ કરી શકે છે. દર અઠવાડિયે દુનિયાભરમાંથી 23 કરોડથી વધુ લોકો ChatGPT ને હેલ્થ વિશે સવાલ પૂછે છે, ત્યારે આ નવું ફીચર હેલ્થ સેક્ટરમાં ગેમ ચેન્જર સાબિત થઈ શકે છે.