રાજકોટ: ગુજરાત સરકારે રાજ્યના શહેરી વિકાસને નવી દિશા આપવા અને મહાનગરો પર વધતા જતા વસ્તીના ભારણને હળવું કરવા માટે એક મહત્વપૂર્ણ નિર્ણય લીધો છે. રાજ્ય સરકારે અમદાવાદ, વડોદરા, સુરત, રાજકોટ અને ગાંધીનગર જેવા મોટા શહેરોની નજીક આવેલા ૫ નગરોને ‘સેટેલાઇટ ટાઉન’ તરીકે વિકસાવવાની જાહેરાત કરી છે. આ માટે માસ્ટર પ્લાન તૈયાર કરવાની પ્રક્રિયા સત્તાવાર રીતે શરૂ કરી દેવામાં આવી છે.

કયા ૫ શહેરો બનશે સેટેલાઇટ ટાઉન?

સરકારની યાદી મુજબ નીચે મુજબના શહેરોની પસંદગી કરવામાં આવી છે:

 * સાણંદ (અમદાવાદ નજીક)

 * સાવલી (વડોદરા નજીક)

 * કલોલ (ગાંધીનગર નજીક)

 * બારડોલી (સુરત નજીક)

 * હિરાસર (રાજકોટ નજીક)

 

*વર્ષ ૨૦૩૦ સુધીમાં મેટ્રો સિટી જેવી સુવિધાઓ*

 

આ પ્રોજેક્ટનો મુખ્ય ઉદ્દેશ્ય વર્ષ ૨૦૩૦ સુધીમાં આ પાંચેય શહેરોમાં મેટ્રો સિટી જેવી અત્યાધુનિક સુવિધાઓ ઊભી કરવાનો છે. રાજ્ય સરકારે આ શહેરો માટે આંતરરાષ્ટ્રીય કક્ષાના અર્બન પ્લાનર્સ પાસે માસ્ટર પ્લાન તૈયાર કરાવવા માટે ટેન્ડર પ્રક્રિયા હાથ ધરી છે. આગામી ૨ મહિનામાં કન્સલ્ટન્ટની નિમણૂક કરવામાં આવશે અને ૧ વર્ષની અંદર આ શહેરોનો સંપૂર્ણ માસ્ટર પ્લાન તૈયાર કરવામાં આવશે.

 

*શું હશે વિશેષ સુવિધાઓ?*

 

આ સેટેલાઇટ ટાઉન્સમાં નાગરિકોને ઉચ્ચ ગુણવત્તાયુક્ત જીવનશૈલી મળી રહે તે માટે વિશેષ આયોજન કરવામાં આવ્યું છે:

 * પરિવહન: આધુનિક પબ્લિક ટ્રાન્સપોર્ટ સિસ્ટમ્સ અને ઇલેક્ટ્રિક બસ સેવા.

 * ઇન્ફ્રાસ્ટ્રક્ચર: રિંગ રોડ, મોડેલ ફાયર સ્ટેશન, અને એડવાન્સ વેસ્ટ મેનેજમેન્ટ સિસ્ટમ્સ.

 * પર્યાવરણ: અર્બન ફોરેસ્ટ પાર્ક અને રમણીય તળાવોનું નિર્માણ.

 * મિક્સ યુઝ ડેવલપમેન્ટ: ‘વોક ટુ વર્ક’ના કોન્સેપ્ટને સાકાર કરવા માટે ઘર, ઓફિસ અને બજાર એકબીજાની નજીક હોય તેવું આયોજન.

 

*વિકસિત ગુજરાત @ ૨૦૪૭ અંતર્ગત મહત્વનું પગલું*

વડાપ્રધાન નરેન્દ્રભાઈ મોદીના ‘વિકસિત ભારત @ ૨૦૪૭’ના વિઝનને સાકાર કરવાના ભાગરૂપે ગુજરાત સરકારે આ પહેલ હાથ ધરી છે. આ પ્રોજેક્ટ દ્વારા ટિયર-૨ અને ટિયર-૩ શહેરોનો સ્ટ્રેટેજિક વિકાસ કરવામાં આવશે. સાણંદ હવે સેમિકન્ડક્ટર હબ તરીકે ઊભરી રહ્યું છે, જ્યારે હિરાસરમાં ઇન્ટરનેશનલ એરપોર્ટના કારણે વિકાસની વિપુલ તકો રહેલી છે. તેવી જ રીતે કલોલ, સાવલી અને બારડોલી પણ ઔદ્યોગિક અને વ્યાપારી દ્રષ્ટિએ મહત્વના કેન્દ્રો બનશે.

 

*‘અર્નિંગ વેલ – લિવિંગ વેલ’*

 

રાજ્ય સરકારે ‘શહેરી વિકાસ વર્ષ ૨૦૨૫’ અંતર્ગત ‘અર્નિંગ વેલ – લિવિંગ વેલ’ના મંત્રને ચરિતાર્થ કરવા આ નિર્ણય લીધો છે. આ સેટેલાઇટ ટાઉન્સ માત્ર રહેણાંક વિસ્તારો જ નહીં, પરંતુ આર્થિક પ્રવૃત્તિઓના ધમધમતા કેન્દ્રો પણ બનશે, જેનાથી સ્થાનિક કક્ષાએ રોજગારીની નવી તકોનું સર્જન થશે.