મુંબઈ : પોતાની હાજરજવાબી અને કોમેડી માટે જાણીતા કપિલ શર્મા અત્યારે સોશિયલ મીડિયા પર ટીકાઓનો સામનો કરી રહ્યા છે. તાજેતરમાં 'ધ ગ્રેટ ઇન્ડિયન કપિલ શો'માં ભારતીય મહિલા ક્રિકેટ ટીમના કોચ અમોલ મુઝુમદાર અને ખેલાડીઓ મહેમાન બન્યા હતા. આ દરમિયાન કપિલે અમોલ મુઝુમદારની સરખામણી 'ચક દે ઇન્ડિયા' ફિલ્મના શાહરૂખ ખાન સાથે કરી હતી, જે બાદ સોશિયલ મીડિયા પર વિવાદ ફાટી નીકળ્યો હતો.
શું હતો વિવાદ?
એપિસોડ દરમિયાન કપિલે અમોલ મુઝુમદારને પૂછ્યું હતું કે, "વર્લ્ડ કપ જીત્યા પછી લોકો ઓનલાઇન તમારી સરખામણી શાહરૂખ ખાન સાથે કરી રહ્યા છે, શું તમે ખરેખર તેના જેવા દેખાઓ છો?" આ વાત પર એક સોશિયલ મીડિયા યુઝર ભડકી ગયો હતો. તેણે એક્સ (ટ્વિટર) પર લખ્યું કે, "મૂર્ખ કપિલ શર્માને ખબર હોવી જોઈએ કે વાસ્તવિક હીરો મીર રંજન નેગી હતા (જેમના જીવન પર ફિલ્મ બની હતી), રીલ હીરો કબીર ખાન નહીં. અમોલ મુઝુમદારે આ જોકરની હકીકત તપાસવી જોઈતી હતી."
કપિલનો પલટવાર
સામાન્ય રીતે ટ્રોલ્સને અવગણતા કપિલે આ વખતે સામે જવાબ આપવાનું નક્કી કર્યું. તેમણે લખ્યું, "પ્રિય સાહેબ, મેં ક્યાં કબીર ખાન કહ્યું? મેં શાહરૂખ ખાન કહ્યું અને તે પણ રમતિયાળ રીતે. તમારી સેન્સ ઓફ હ્યુમર જ ખોટી છે." જ્યારે અન્ય એક ચાહકે કપિલને આવા ટ્રોલ્સ પર ધ્યાન ન આપવા કહ્યું, ત્યારે કપિલે પોતાની અસલી શૈલીમાં લખ્યું, "મને ખબર છે, હું તે સમયે ટોયલેટમાં બેઠો હતો એટલે મારી પાસે જવાબ આપવાનો સમય હતો, હાહાહા!"
ક્રિકેટરોએ પણ લીધી મજા
શો દરમિયાન જેમીમા રોડ્રિગ્સે પણ મજાક કરતા કહ્યું હતું કે, કોચે પોતાનું નામ બદલીને 'કબીર મુઝુમદાર' રાખી લીધું છે. આ વિવાદ વચ્ચે કપિલના સમર્થનમાં વકીલો અને ફેન્સ પણ આવ્યા હતા, જેમણે સ્પષ્ટ કર્યું કે કપિલે માત્ર એક ફિલ્મનો અને અભિનેતાનો ઉલ્લેખ કર્યો હતો, કોઈ ઇતિહાસને નકાર્યો નહોતો.
વર્ષ ૨૦૨૬ની શરૂઆતમાં જ કપિલનો આ શો પ્રિયંકા ચોપરા અને મહિલા ક્રિકેટ ટીમ જેવા દિગ્ગજો સાથે ધૂમ મચાવી રહ્યો છે, પરંતુ આ સોશિયલ મીડિયા યુદ્ધે મનોરંજન જગતમાં નવી ચર્ચા છેડી દીધી છે.