ઢાકા: બાંગ્લાદેશમાં ચાલી રહેલી રાજકીય અસ્થિરતા અને હિંસાની વચ્ચે એક નવો ચહેરો સોશિયલ મીડિયા પર 'મિસ્ટ્રી ગર્લ' તરીકે વાયરલ થઈ રહ્યો છે. આ ચહેરો બીજું કોઈ નહીં પણ બાંગ્લાદેશ નેશનાલિસ્ટ પાર્ટી (BNP) ના પ્રમુખ ખાલિદા ઝિયાની પૌત્રી અને લંડનથી બેરિસ્ટર બનેલી ઝાઈમા રહેમાન છે. ઝાઈમાની બાંગ્લાદેશ વાપસીએ દેશના રાજકારણમાં નવો વળાંક લાવી દીધો છે અને અનેક અટકળો વહેતી થઈ છે કે શું તે બાંગ્લાદેશની આગામી મહિલા વડાપ્રધાન બની શકે છે?
રાજકીય વારસો અને શિક્ષણ: ઝાઈમા રહેમાન બાંગ્લાદેશના પૂર્વ રાષ્ટ્રપતિ ઝિયાઉર રહેમાન અને પૂર્વ વડાપ્રધાન ખાલિદા ઝિયાની પૌત્રી છે. તેના પિતા તારિક રહેમાન પણ BNPના કાર્યકારી અધ્યક્ષ છે. ઝાઈમાએ લંડનની પ્રતિષ્ઠિત ક્વીન મેરી યુનિવર્સિટીમાંથી કાયદાનો અભ્યાસ કર્યો છે અને તે વ્યવસાયે બેરિસ્ટર છે. લાંબા સમય સુધી લંડનમાં રહ્યા બાદ તેની સ્વદેશ વાપસીને બાંગ્લાદેશના રાજકારણમાં 'યુવા પરિવર્તન' તરીકે જોવામાં આવી રહી છે.
કટ્ટરપંથીઓ અને વિપક્ષમાં ફફડાટ: ઝાઈમાની છબી એક આધુનિક અને ભણેલી-ગણેલી યુવા નેતા તરીકેની છે. તેની એન્ટ્રીથી દેશના કટ્ટરપંથી સંગઠનોમાં ફફડાટ જોવા મળી રહ્યો છે, કારણ કે તે ઉદારવાદી વિચારો અને લોકશાહીના હિમાયતી માનવામાં આવે છે. રાજકીય વિશ્લેષકોનું માનવું છે કે ઝાઈમા તેના પિતા તારિક રહેમાનના રાજકીય વારસાને આગળ વધારી શકે છે અને યુવા મતદારોને આકર્ષવામાં મહત્વની ભૂમિકા ભજવી શકે છે.
શું હિન્દુઓ પરના હુમલા અટકશે?: બાંગ્લાદેશમાં તાજેતરની હિંસા દરમિયાન લઘુમતી હિન્દુઓ પર થયેલા હુમલાઓને લઈને વિશ્વભરમાં ચિંતા વ્યક્ત કરવામાં આવી છે. હવે ઝાઈમા રહેમાનની એન્ટ્રી બાદ ભારત સહિત પડોશી દેશોની નજર એ વાત પર છે કે શું તેની આગેવાનીમાં દેશમાં શાંતિ સ્થપાશે અને લઘુમતીઓને સુરક્ષા મળશે? અત્યારે તો ઝાઈમાની દરેક મૂવમેન્ટ પર બાંગ્લાદેશી સેના અને વચગાળાની સરકારની નજર છે.
ઝાઈમા રહેમાનની વાયરલ થયેલી તસવીરો અને તેના વીડિયોએ બાંગ્લાદેશના સોશિયલ મીડિયા પર અત્યારે સુનામી લાવી દીધી છે, જે સૂચવે છે કે બાંગ્લાદેશના આગામી લોકશાહી જંગમાં તે સૌથી મોટું ફેક્ટર સાબિત થઈ શકે છે.