વૉશિંગ્ટન/નવી દિલ્હી: વૈશ્વિક ટેક જાયન્ટ એપલ ૨૦૨૬ ના અંત સુધીમાં અમેરિકામાં વેચાતા તેના તમામ સ્માર્ટફોનનું એસેમ્બલી કામ ભારત ખસેડવાની તૈયારી કરી રહ્યું છે. અમેરિકા અને ચીન વચ્ચે ચાલી રહેલા વ્યાપારિક તણાવ અને ચીન પર લાદવામાં આવેલા ઊંચા આયાત શુલ્કને ટાળવા માટે કંપનીએ આ વ્યૂહાત્મક નિર્ણય લીધો છે.

એક અહેવાલ મુજબ, વર્ષ ૨૦૨૬ સુધીમાં અમેરિકામાં વેચાતા વાર્ષિક ૬ કરોડથી વધુ આઇફોન ભારતમાં તૈયાર કરવામાં આવશે.

ભારતમાં ટાટા ઇલેક્ટ્રોનિક્સ અને ફોક્સકોન જેવી કંપનીઓ આ ઉત્પાદન પ્રક્રિયામાં મુખ્ય ભાગીદાર છે. ગુજરાતના સાણંદ ખાતે પણ ચિપ પેકેજિંગ માટેની તૈયારીઓ ચાલી રહી છે, જે આ સપ્લાય ચેઇનમાં ભારતની ભૂમિકાને વધુ મજબૂત બનાવશે. 

હાલમાં ભારતમાં આઇફોન ૧૭ નું પ્રાયોગિક ધોરણે ઉત્પાદન શરૂ કરવાની તૈયારીઓ પણ થઈ ચૂકી છે. આ પગલાથી ભારતમાં હજારો નવી રોજગારીની તકો ઊભી થશે અને દેશના નિકાસ ક્ષેત્રને મોટો વેગ મળશે.