ઇઝરાયેલના રાજકારણમાં મોટો ગરમાવો આવ્યો છે. લાંબા સમયથી ચાલી રહેલા ભ્રષ્ટાચારના કેસનો સામનો કરી રહેલા વડાપ્રધાન બેન્જામિન નેતન્યાહુએ હવે રાષ્ટ્રપતિ પાસે સત્તાવાર રીતે માફી આપવા માટે અરજી કરી છે. નેતન્યાહુ પર ચાલી રહેલા આ મુકદમાને કારણે દેશ બે ભાગમાં વહેંચાઈ ગયો છે અને રાજકીય અસ્થિરતાનો માહોલ સર્જાયો છે.
પ્રાપ્ત વિગતો અનુસાર, નેતન્યાહુએ પોતાના પર લાગેલા લાંચ, છેતરપિંડી અને વિશ્વાસઘાતના આરોપોમાંથી મુક્તિ મેળવવા માટે આ અંતિમ દાવ રમ્યો છે. તેમના પર આરોપ છે કે તેમણે શ્રીમંત ઉદ્યોગપતિઓ પાસેથી ભેટો સ્વીકારી હતી અને મીડિયામાં પોતાના હકારાત્મક કવરેજ માટે નિયમોમાં ફેરફાર કર્યા હતા. 
જોકે, નેતન્યાહુ સતત આ આરોપોને રાજકીય રીતે પ્રેરિત ગણાવતા આવ્યા છે. રવિવારે તેમણે રાષ્ટ્રપતિને વિનંતી કરી હતી કે દેશના હિતમાં અને રાજકીય સ્થિરતા જાળવવા માટે તેમને માફી આપવામાં આવે.
આ સમાચાર સામે આવતા જ ઇઝરાયેલમાં વિરોધ પક્ષોએ ભારે હોબાળો મચાવ્યો છે. ટીકાકારોનું કહેવું છે કે કાયદાના શાસનમાં કોઈ પણ વ્યક્તિ કાયદાથી ઉપર નથી, ભલે તે વડાપ્રધાન હોય. 
બીજી તરફ, નેતન્યાહુના સમર્થકો માને છે કે તેમને ખોટી રીતે ફસાવવામાં આવ્યા છે અને દેશના નેતૃત્વ પર ધ્યાન કેન્દ્રિત કરવા માટે આ કેસનો અંત આવવો જરૂરી છે. આ 'માફી'ની માંગણી બાદ ઇઝરાયેલમાં ફરી એકવાર મોટા પાયે વિરોધ પ્રદર્શનો શરૂ થવાની શક્યતા છે