મુંબઈ: ભારતીય સિનેમાના ઈતિહાસમાં એક યુગનો અંત આવ્યો છે. હિન્દી ફિલ્મોના 'હી-મેન' તરીકે જાણીતા અને દર્શકોના દિલ પર રાજ કરનાર સુપ્રસિદ્ધ અભિનેતા ધર્મેન્દ્રનું ૨૪ નવેમ્બર, ૨૦૨૫ના રોજ મુંબઈ ખાતે નિધન થયું છે. તેઓ ૮૯ વર્ષના હતા અને છેલ્લા કેટલાક સમયથી વય-સંબંધિત બીમારીઓનો સામનો કરી રહ્યા હતા.

આજે બપોરે મુંબઈના વિલે પાર્લેમાં આવેલા પવન હંસ સ્મશાન ગૃહમાં તેમના અંતિમ સંસ્કાર કરવામાં આવ્યા હતા. તેમના મોટા પુત્ર અને અભિનેતા સની દેઓલે ભીની આંખે પિતાના પાર્થિવ દેહને મુખાગ્નિ આપી હતી. આ સમયે વાતાવરણ અત્યંત ગમગીન બની ગયું હતું.

ઉલ્લેખનીય છે કે, ધર્મેન્દ્રના નિધન બાદ તેમના પરિવારે આ બાબતને અત્યંત ખાનગી રાખી હતી. અંતિમ ક્રિયાની તૈયારીઓ પૂર્ણ થઈ ગઈ અને અંતિમ યાત્રા નીકળી ત્યાં સુધી મીડિયા કે ચાહકોને સત્તાવાર રીતે કોઈ વિગતો આપવામાં આવી ન હતી. જ્યારે પાર્થિવ દેહને સ્મશાન ગૃહ લઈ જવામાં આવ્યો ત્યારે જ બહારની દુનિયાને આ દુઃખદ ઘટનાની જાણ થઈ હતી. આ ગુપ્તતા પાછળનો પરિવારનો હેતુ સદ્ગતને શાંતિથી અંતિમ વિદાય આપવાનો હોવાનું માનવામાં આવે છે.

તેમના અંતિમ દર્શન માટે બોલિવૂડની તમામ મોટી હસ્તીઓ ઉમટી પડી હતી. ધર્મેન્દ્રના પત્ની હેમા માલિની અને બંને પુત્રીઓ ઈશા અને આહના દેઓલ તેમજ પુત્રો સની અને બોબી દેઓલ અત્યંત શોકમગ્ન અવસ્થામાં જોવા મળ્યા હતા. આ ઉપરાંત અમિતાભ બચ્ચન, અભિષેક બચ્ચન, શાહરુખ ખાન, સલમાન ખાન, આમિર ખાન અને કરણ જોહર સહિતના કલાકારોએ સ્મશાન ગૃહ પહોંચીને શ્રદ્ધાંજલિ પાઠવી હતી.

થોડા સમય પહેલાં જ તેમને શ્વાસની તકલીફને કારણે બ્રીચ કેન્ડી હોસ્પિટલમાં દાખલ કરવામાં આવ્યા હતા, જ્યાંથી ૧૨ નવેમ્બરના રોજ તેમને રજા આપવામાં આવી હતી. ત્યારે તેમના મૃત્યુની ભારે અપવાદ ઉડી હતી. જેનો પરિવાર એ પાછળથી રદિયો આપી ખૂબ જ દુઃખ વ્યક્ત કરેલ. આજે તેમની તબિયત ફરી લથડી હતી અને તેમણે જુહુ સ્થિત નિવાસસ્થાને અંતિમ શ્વાસ લીધા હતા.

*જીવન ઝરમર: ખેતરોથી શરૂ થયેલી સફર ફિલ્મી પડદા સુધી*

 * જન્મ: ધર્મેન્દ્રનો જન્મ ૮ ડિસેમ્બર, ૧૯૩૫ના રોજ પંજાબના લુધિયાણા જિલ્લાના નસરાલી ગામમાં થયો હતો. તેમનું મૂળ નામ ધરમ સિંહ દેઓલ હતું.

 * કારકિર્દીની શરૂઆત: ૧૯૬૦માં ફિલ્મ 'દિલ ભી તેરા હમ ભી તેરે' દ્વારા તેમણે હિન્દી સિનેમામાં પ્રવેશ કર્યો હતો. જોકે, તેમને ખરી ઓળખ ૧૯૬૬માં આવેલી ફિલ્મ 'ફૂલ ઔર પથ્થર'થી મળી હતી, જેમાં તેમનું શર્ટ ઉતારવાનું દ્રશ્ય ખૂબ જ લોકપ્રિય થયું હતું.

 * સુવર્ણકાળ: ૧૯૭૫માં આવેલી બ્લોકબસ્ટર ફિલ્મ 'શોલે'માં તેમણે ભજવેલું 'વીરુ'નું પાત્ર અમર થઈ ગયું. આ ઉપરાંત 'ચુપકે ચુપકે', 'સીતા ઔર ગીતા', 'ધરમ વીર', 'યાદો કી બારાત' અને 'સત્યકામ' જેવી ૩૦૦થી વધુ ફિલ્મોમાં તેમણે અભિનયના ઓજસ પાથર્યા હતા.

 * સન્માન: કળા ક્ષેત્રે તેમના યોગદાન બદલ ભારત સરકારે ૨૦૧૨માં તેમને 'પદ્મ ભૂષણ'થી સન્માનિત કર્યા હતા. ૧૯૯૭માં તેમને ફિલ્મફેર લાઈફટાઈમ અચીવમેન્ટ એવોર્ડ એનાયત કરવામાં આવ્યો હતો.

 * રાજકીય સફર: તેઓ ૨૦૦૪ થી ૨૦૦૯ સુધી રાજસ્થાનના બિકાનેર બેઠક પરથી લોકસભાના સાંસદ પણ રહ્યા હતા.

 * પરિવાર: તેમના પ્રથમ લગ્ન પ્રકાશ કૌર સાથે થયા હતા, જેમનાથી તેમને બે પુત્રો સની અને બોબી તથા બે પુત્રીઓ વિજેતા અને અજેતા છે. બીજા લગ્ન ભાજપ સાંસદ અને અભિનેત્રી હેમા માલિની સાથે થયા હતા, જેમનાથી તેમને બે પુત્રીઓ ઈશા અને આહના છે.

હિન્દી સિનેમાએ આજે તેનો હિમેન સૌથી મજબૂત સિતારો ગુમાવ્યો છે, પરંતુ તેઓ પોતાની ફિલ્મો દ્વારા તેઓ સદાય ચાહકોના દિલમાં જીવંત રહેશે.