ગ્વાલિયર: મધ્યપ્રદેશના ગ્વાલિયરમાં આજે સવારે ગ્વાલિયર-ઝાંસી હાઇવે પર એક અત્યંત ભયાનક માર્ગ અકસ્માત સર્જાતા પાંચ યુવાનોના ઘટનાસ્થળે જ કરૂણ મોત નીપજ્યા છે. ઝાંસી તરફથી આવી રહેલી એક ઝડપી ફોર્ચ્યુનર કાર વળાંક પરથી અચાનક નીકળેલા રેતી ભરેલા ટ્રેક્ટર સાથે એટલી જોરથી અથડાઈ કે, કાર કાબૂ બહાર જઈને ટ્રેક્ટરની ટ્રોલી નીચે લગભગ અડધા ભાગ સુધી ઘૂસી ગઈ હતી.
પોલીસ સૂત્રો દ્વારા મળતી માહિતી મુજબ, સવારે લગભગ ૬:૩૦ વાગ્યે માલવા કોલેજ સામે આ દુર્ઘટના બની હતી. અકસ્માત એટલો ગંભીર અને ભયાનક હતો કે ફોર્ચ્યુનર કારનો સંપૂર્ણપણે કચ્ચરઘાણ થઈ ગયો હતો. કારમાં સવાર પાંચેય યુવાનોના મૃતદેહ ટ્રેક્ટરની ટ્રોલી અને કારના ભંગાર વચ્ચે 'પાપડની જેમ ચિપકાયેલા' ફસાઈ ગયા હતા. આ દ્રશ્ય એટલું કરૂણ હતું કે જોનારાઓના પણ રૂંવાડા ઊભા થઈ ગયા હતા.
સીએસપી હિના ખાને જણાવ્યું કે, પોલીસ તાત્કાલિક ઘટનાસ્થળે પહોંચી હતી અને ગ્રામજનોની મદદથી કારને કટરથી કાપીને ઘણી મહેનત બાદ મૃતદેહોને બહાર કાઢવા પડ્યા હતા. તેમણે પુષ્ટિ કરી હતી કે કારમાં સવાર પાંચેય યુવાનો મિત્રો હતા અને કોઈ જીવિત મળ્યું નથી. મૃતદેહોને પોસ્ટમોર્ટમ માટે જિલ્લા હોસ્પિટલમાં મોકલી દેવામાં આવ્યા છે, અને તેમની ઓળખની પ્રક્રિયા ચાલુ છે.
પોલીસે અકસ્માત સર્જીને નાસી છૂટેલા ટ્રેક્ટર ડ્રાઈવર વિરુદ્ધ ફરિયાદ નોંધી છે. ડ્રાઈવરનો સંપર્ક નંબર મળી ગયો છે, જેના આધારે તેની સામે કાયદેસરની કાર્યવાહી કરવામાં આવી રહી છે. હાઈવે પર થયેલા આ ગમખ્વાર અકસ્માતથી ફરી એકવાર સુરક્ષા અને સ્પીડ લિમિટના નિયમો પર સવાલો ઊભા થયા છે.