નવી દિલ્હી: દિલ્હીમાં ૧૦ નવેમ્બરના રોજ થયેલા મોટા કાર બ્લાસ્ટની ભારતીય તપાસ એજન્સીઓ ઝીણવટભરી તપાસ કરી રહી છે. આ તપાસ વચ્ચે, એક પાકિસ્તાની પત્રકારનો પાંચ મહિના જૂનો વીડિયો સોશિયલ મીડિયા પર વાયરલ થયો છે, જેણે આતંકી હુમલાના ષડયંત્ર પર મોટો ખુલાસો કર્યો છે. પાકિસ્તાનની ગુપ્તચર સંસ્થા ISI ની ખૂબ નજીકના માનવામાં આવતા વરિષ્ઠ પત્રકાર જાવેદ ચૌધરીએ મે ૨૦૨૫ માં સ્પષ્ટપણે દાવો કર્યો હતો કે ભારતમાં આતંકવાદી હુમલા થશે, અને તેની પાછળ મસૂદ અઝહર અને હાફિઝ સઈદ નો હાથ હશે.
વીડિયોમાં જાવેદ ચૌધરીએ ઘટસ્ફોટ કર્યો હતો કે ભારતમાં 'ઓપરેશન સિંદૂર' પછી મસૂદ અઝહરને જે નુકસાન થયું હતું, તેના બદલામાં તેને ભારતમાં આતંકવાદી હુમલા કરવા માટે છૂટ આપવામાં આવી છે. ચૌધરી સ્પષ્ટપણે કહે છે કે આ હુમલાઓ ભારતમાં કાર્યરત મસૂદ અઝહરના 'સ્લીપર સેલ' દ્વારા કરવામાં આવશે. આ વીડિયો દિલ્હી બ્લાસ્ટના પાંચ મહિના પહેલાનો હોવાથી, તે સ્પષ્ટ સંકેત આપે છે કે આ હુમલાઓ કોઈ તત્કાળ પ્રતિક્રિયા નહીં, પરંતુ એક જૂની અને પૂર્વ-આયોજિત યોજના નું પરિણામ છે.
જાવેદ ચૌધરીએ વીડિયોમાં આગળ જણાવ્યું હતું કે ભારત દ્વારા કરાયેલા હુમલાઓ પછી મૌલાના મસૂદ અઝહરે પોતાનો બદલો જાહેર કર્યો છે, કારણ કે તેના મૂળ ભારતમાં ઊંડા છે અને તેના ફિદાયીન (આત્મઘાતી હુમલાખોરો) અદ્ભુત છે. ચૌધરીએ ભારપૂર્વક કહ્યું હતું કે, "અત્યાર સુધી પાકિસ્તાને મસૂદ અઝહર અને હાફિઝ સઈદના નેટવર્કને પાકિસ્તાનમાં પ્રતિબંધિત કર્યું હતું, પરંતુ હવે તેમને છૂટ આપવામાં આવી છે." આ નિવેદન સ્પષ્ટપણે સૂચવે છે કે પાકિસ્તાન સરકાર અને સૈન્ય ફરી એકવાર ભારતમાં હુમલા કરવા માટે આતંકવાદી નેટવર્કનો ઉપયોગ કરવાની નીતિ પર પાછી ફરી છે.
જોકે પાકિસ્તાન આતંકવાદનો ભોગ બનવાનો દાવો કરે છે, પરંતુ આ ખુલ્લો દાવો સ્પષ્ટપણે દર્શાવે છે કે સરકાર અને પત્રકારો સહિત પાકિસ્તાન પ્રોક્સી યુદ્ધ લડી રહ્યું છે. દિલ્હીમાં ૧૦ નવેમ્બરે વિસ્ફોટ થયાના બીજા જ દિવસે પાકિસ્તાનમાં પણ આવો જ એક વિસ્ફોટ થવો, એ પણ આતંકવાદી કૃત્યને છુપાવવાનું પૂર્વનિર્ધારિત આયોજન હોવાનો સંકેત આપે છે. ભારતીય એજન્સીઓ હવે આ વીડિયોને પણ તપાસના એક મહત્ત્વના ભાગ તરીકે જોઈ રહી છે.તેવું એક હિન્‍દી ન્‍યુઝ ચેનલ દ્વારા જાણવા મળેલ છે.