ભાગલપુર (બિહાર). બિહારની ચૂંટણીમાં ભાગલપુર બેઠક પર ભાજપમાં મોટો રાજકીય ડ્રામા સર્જાયો. પૂર્વ કેન્દ્રીય મંત્રી અશ્વિની ચૌબેના પુત્ર અર્જિત ચૌબેએ ભાજપમાંથી ટિકિટ ન મળતાં બળવો પોકાર્યો અને અપક્ષ ઉમેદવાર તરીકે ફોર્મ ભરવાનો નિર્ણય લીધો. તેઓ સેંકડો સમર્થકો અને ઉત્સાહ સાથે જિલ્લા કલેક્ટર કચેરીએ પહોંચ્યા, પરંતુ છેલ્લી ઘડીએ એક જ ફોન કોલે તેમની આશાઓ પર પાણી ફેરવી દીધું!
અર્જિત ચૌબે માળાઓથી લદાયેલા હતા અને પત્રકારો સાથે વાત કરવાની તૈયારી કરી રહ્યા હતા, ત્યાં જ તેમનો ફોન રણક્યો.
અર્જિત ચૌબેએ તરત જ પત્રકારોની સામે ફોન ઉપાડ્યો અને વાતચીત પૂર્ણ થયા બાદ જાહેર કર્યું કે:
 "આજે, મારા પિતા અશ્વિની ચૌબે અને માતાએ પણ મારી સાથે વાત કરી હતી. આ ભાજપના ટોચના નેતૃત્વ તરફથી સૂચના હતી. હું તેમનો વિરોધ કેવી રીતે કરી શકું? હું મારા પક્ષ અને દેશ સામે બળવો કરી શકતો નથી."
અર્જિત ચૌબેએ પોતાના પિતા અશ્વિની ચૌબેની સૂચનાને માન આપીને ઉમેદવારી પત્ર ભર્યા વિના જ પાછા ફરવાનો નિર્ણય લીધો. તેમણે પોતાના સમર્થકોને શાંત પાડ્યા અને કહ્યું કે તેઓ હવે ચૂંટણી મેદાનમાંથી ખસી રહ્યા છે અને ભાજપના સત્તાવાર ઉમેદવાર રોહિત પાંડેની જીત સુનિશ્ચિત કરવા માટે કામ કરશે.
નોંધનીય છે કે, ભાજપે રોહિત પાંડેને ફરીથી ટિકિટ આપતા ચૌબે જૂથમાં અસંતોષ ફેલાયો હતો, કારણ કે પાંડે ૨૦૨૦ની વિધાનસભા ચૂંટણીમાં નજીકના અંતરથી હારી ગયા હતા. જોકે, પિતાના સીધા હસ્તક્ષેપથી અર્જિત ચૌબેનો બળવો શરૂ થતા પહેલા જ સમાપ્ત થઈ ગયો છે.