અફઘાનિસ્તાનના સ્ટાર ક્રિકેટર રાશિદ ખાન પાકિસ્તાન તરફથી કરવામાં આવેલા હવાઈ હુમલામાં ત્રણ યુવા અફઘાન ક્રિકેટરો સહિત આઠ નાગરિકોના મોતથી ભયંકર રીતે ગુસ્સે ભરાયા છે. આ દુર્ઘટના પર પ્રતિક્રિયા આપતા રાશિદ ખાને પાકિસ્તાનના કૃત્યને "બર્બર, અનૈતિક અને અમાનવીય" ગણાવ્યું છે અને આકરા શબ્દોમાં ટીકા કરી છે.

પાકિસ્તાન સામે મેચો રદ કરવાના નિર્ણયને સમર્થન:
રાશિદ ખાને X (ભૂતપૂર્વ ટ્વિટર) પર અને ઇન્સ્ટાગ્રામ પર એક ભાવનાત્મક પોસ્ટ શેર કરી હતી. તેમણે લખ્યું, "પાકિસ્તાની હવાઈ હુમલાને કારણે અફઘાનિસ્તાનમાં નાગરિકોના મોતથી હું ખૂબ જ દુઃખી છું. આ એક દુર્ઘટના છે જેમાં મહિલાઓ, બાળકો અને એવા યુવા ક્રિકેટરોના જીવ ગયા છે જેમણે વિશ્વ સ્તરે પોતાના દેશનું પ્રતિનિધિત્વ કરવાનું સ્વપ્ન જોયું હતું."

તેમણે સ્પષ્ટપણે જણાવ્યું કે, નાગરિક માળખાગત સુવિધાઓને નિશાન બનાવવું એ સંપૂર્ણપણે અન્યાયી, ગેરકાયદેસર અને માનવ અધિકારોનું ગંભીર ઉલ્લંઘન છે, જેને અવગણી શકાય નહીં.

ગુસ્સે ભરાયેલા રાશિદે આગળ કહ્યું:
"હું અફઘાન ક્રિકેટ બોર્ડ (ACB) દ્વારા પાકિસ્તાન સામેની આગામી મેચોમાંથી ખસી જવાના નિર્ણયનું સંપૂર્ણ સમર્થન કરું છું. જેમણે પોતાનો જીવ ગુમાવ્યો હતો, તેમને શ્રદ્ધાંજલિ છે. હું આ મુશ્કેલ સમયમાં મારા લોકો સાથે ખભે ખભો મિલાવીને ઊભો છું. આપણું રાષ્ટ્રીય ગૌરવ હંમેશા પહેલા આવવું જોઈએ!"

શહીદ થયેલા યુવા ખેલાડીઓ:
પાકિસ્તાની હુમલામાં કબીર, સિબગતુલ્લાહ અને હારૂન નામના ત્રણ યુવા ક્રિકેટરો શહીદ થયા છે. આ ઘટના બાદ, અફઘાનિસ્તાન ક્રિકેટ બોર્ડ (ACB) એ તાત્કાલિક કાર્યવાહી કરી અને આવતા મહિને નવેમ્બરમાં પાકિસ્તાન અને શ્રીલંકા સાથે થનારી ત્રિકોણીય T20 શ્રેણીમાંથી ખસી જવાનો સખત નિર્ણય લીધો છે.

ACB એ તેના શોક નિવેદનમાં કહ્યું કે આ કાયરતાપૂર્ણ હુમલામાં પક્તિકા પ્રાંતના ઉર્ગુન જિલ્લાના બહાદુર ક્રિકેટરોને નિશાન બનાવવામાં આવ્યા હતા. ACB એ આને દેશના રમત જગત, ખાસ કરીને ક્રિકેટ માટે એક મોટી અને ભરપાઈ ન થઈ શકે તેવી ખોટ ગણાવી છે.

ક્રિકેટરો શરણામાં મૈત્રીપૂર્ણ મેચ રમીને ઘરે પરત ફર્યા હતા અને આ હુમલો ઉર્ગુન જિલ્લામાં એક મેળાવડા દરમિયાન કરવામાં આવ્યો હતો. આ સમગ્ર ઘટનાએ આંતરરાષ્ટ્રીય સ્તરે ચકચાર જગાવી છે.