અલવર, તા.૧૧: ભારતમાં રહીને પાકિસ્‍તાન માટે જાસૂસી કરતા લોકોની સુરક્ષા એજન્‍સીઓ દ્વારા સતત શોધ કરવામાં આવી રહી છે. જેમાં રાજસ્‍થાનના અલવરમાંથી હનીટ્રેપમાં ફસાયેલા અને આઈએસઆઈ માટે જાસૂસી કરતા યુવકની પોલીસે ધરપકડ કરી છે. આ અંગે મળતી મહિતી મુજબ રાજસ્‍થાન ઈન્‍ટેલીજન્‍સે અલવરના મંગત સિંહની ધરપકડ કરી છે. જે અલવરના સેના કેન્‍ટોન્‍મેન્‍ટની તમામ માહિતી પાકિસ્‍તાન મોકલતો હતો. તેની પાસેથી પાકિસ્‍તાનના બે નંબર મળી આવ્‍યા છે. જેમાં એક નંબર હનીટ્રેપ સાથે સંકળાયેલો છે. જયારે બીજો નંબર પણ પાકિસ્‍તાનનો જ છે.

અલવરનો મંગત સિંહને આ કામ બદલ પાકિસ્‍તાન તરફથી અનેક વાર મોટી રકમ ટ્રાન્‍સફર કરવામાં આવી છે. તે હજુ પણ તેમના સંપર્કમાં છે અને તેમને ગુપ્ત માહિતી મોકલી રહ્યો છે. પોલીસે આ સમગ્ર કેસની તપાસ હાથ ધરી છે.

અલવરમાં કેન્‍ટોન્‍મેન્‍ટ વિસ્‍તારની દેખરેખ દરમિયાન અલવરના ગોવિંદગઢના રહેવાસી મંગત સિંહની ગતિવિધિઓ શંકાસ્‍પદ જોવા મળી હતી. મંગત સિંહ છેલ્લા બે વર્ષથી સોશિયલ મીડિયા દ્વારા પાકિસ્‍તાની ગુપ્તચર એજન્‍સીના હેન્‍ડલર્સ સાથે સંપર્કમાં હતો. ઓપરેશન સિંદૂર પૂર્વે અને બાદમાં મંગત સિંહ ઈશા શર્મા નામ ધરાવતી એક મહિલા પાકિસ્‍તાની હેન્‍ડલરના હનીટ્રેપનો શિકાર બન્‍યો હતો. તે પૈસાની લાલચમાં અલવર શહેરના સૌથી મહત્‍વપૂર્ણ છાવણી વિસ્‍તાર અને દેશના અન્‍ય વ્‍યૂહાત્‍મક સ્‍થળો વિશેની મહત્‍વપૂર્ણ માહિતી સોશિયલ મીડિયા દ્વારા તેમની સાથે સતત શેર કરતો હતો.(૨૩.૧૭)