દિલ્હી: કેન્દ્રીય ગૃહ અને સહકાર મંત્રી અમિતભાઈ શાહે ગુરુવારે દિલ્હીની જીવનરેખા ગણાતી યમુના નદીને સ્વચ્છ કરવાના મહત્ત્વપૂર્ણ પ્રોજેક્ટ્સનું ઉદ્ઘાટન અને શિલાન્યાસ કર્યો. યમુના સફાઈ સંબંધિત આ વિકાસ પ્રોજેક્ટ્સની કુલ કિંમત આશરે ₹1,816 કરોડ છે.

આ પ્રસંગે દિલ્હીના મુખ્યમંત્રી રેખા ગુપ્તા સહિત અનેક કેબિનેટ મંત્રીઓ મંચ પર ઉપસ્થિત રહ્યા હતા.
 
શાહનો દિલ્હીવાસીઓને સંદેશ: બેવડી દિવાળી
ગૃહમંત્રી અમિતભાઈ શાહે આ પ્રોજેક્ટ્સના ઉદ્ઘાટન સાથે દિલ્હીના લોકોને મોંઘવારીમાં રાહત આપતા કેટલાક સરકારી નિર્ણયોની પણ યાદ અપાવી અને કહ્યું કે આ વખતે દિલ્હીવાસીઓ માટે "બેવડી દિવાળી" છે.

• GST અને કર રાહત: અમિતભાઈ શાહે જણાવ્યું કે, "અમે GST કર દર ઘટાડ્યા છે. 395 થી વધુ વસ્તુઓ પરના કરને કાં તો શૂન્ય કરવામાં આવ્યા છે અથવા પાંચ ટકા સુધી મર્યાદિત કરવામાં આવ્યા છે."

• આવકવેરા મુક્તિ: તેમણે વધુમાં ઉમેર્યું કે ₹12 લાખ સુધીનો આવકવેરો નાબૂદ કરવામાં આવ્યો છે. શાહે ભૂતકાળની મનમોહન સિંહ સરકાર પર નિશાન સાધતા કહ્યું કે મોદી સરકારે 10 વર્ષમાં આવકવેરા મુક્તિની મર્યાદા ₹2 લાખથી વધારીને ₹12 લાખ કરી છે.

અમિતભાઈ શાહે આ પરિવર્તનને દેશના લોકો દ્વારા નરેન્દ્ર મોદીને સતત ત્રીજી વખત વડા પ્રધાન તરીકે ચૂંટવાના નિર્ણયનું પરિણામ ગણાવ્યું હતું. યમુનાની સફાઈનું લક્ષ્ય હવે ઝડપથી આગળ વધ્યું છે, જે દિલ્હીવાસીઓની લાંબા સમયથી પડતર માંગણી હતી.