બાળકોની નજર સામે પિતાની અતિ ક્રૂર હત્યા : આંગળીઓ કાપી નાખીઃ ગેસ સિલિન્ડરના ગેરકાયદે વેપારની અદાવતમાં લોહીયાળ ખેલ
છત્રપતિ સંભાજીનગર (મહારાષ્ટ્ર) : મહારાષ્ટ્રના છત્રપતિ સંભાજીનગર (અગાઉનું ઔરંગાબાદ) માંથી એક અત્યંત હૃદયદ્રાવક અને ચોંકાવનારી ઘટના સામે આવી છે, જ્યાં લગભગ અડધો ડઝન હુમલાખોરોએ એક વ્યક્તિની તેના સગીર બાળકોની નજર સામે ક્રૂરતાપૂર્વક હત્યા કરી નાખી. હુમલાખોરોએ તીક્ષ્ણ હથિયારો વડે ઉપરાછાપરી ઘા ઝીંક્યા હતા અને સ્વબચાવમાં પ્રયાસ કરતા ભોગ બનનારની આંગળીઓ પણ કાપી નાખી હતી.
સગીર બાળકોની સામે પિતા પર ઘાતકી હુમલો : મૃતકની ઓળખ સિલ્ક મિલ કોલોનીના રહેવાસી સૈયદ ઇમરાન શફીક તરીકે થઈ છે. બુધવારે રાત્રે શફીક તેના ત્રણ વર્ષના પુત્ર અને ૧૩ વર્ષની પુત્રી સાથે ઓટો-રિક્ષામાં રેલ્વે સ્ટેશન નજીકથી પરત ફરી રહ્યા હતા. આ દરમિયાન, એક કારે તેમની રિક્ષાને રોકી હતી. કારમાંથી ઉતરેલા પાંચથી છ જેટલા શંકાસ્પદોએ તરત જ સૈયદ ઇમરાન શફીક પર હુમલો કર્યો.
નિર્દયતાની તમામ હદો વટાવીને, હુમલાખોરોએ પિતાને ઓટો-રિક્ષામાંથી ખેંચી કાઢ્યા અને પછી માસૂમ બાળકોની સામે જ તેમના પર અત્યંત ક્રૂરતા આચરી.
કુહાડી અને છરીઓથી ઉપરાછાપરી ઘા, સ્થળ પર જ મોતઃ મીડિયા અહેવાલો મુજબ, હુમલાખોરોએ તીક્ષ્ણ કુહાડી અને છરીઓ વડે શફીક પર હુમલો કર્યો હતો.
શફીકે પોતાનો બચાવ કરવા અને હથિયાર છીનવી લેવાનો પ્રયાસ કર્યો.
જવાબમાં, હુમલાખોરોએ પહેલા તેના હાથની આંગળીઓ કાપી નાખી અને ત્યારબાદ તેના કાંડા પર ઊંડા ઘા કર્યા.
પછી તેના માથા, ગરદન અને છાતીના ભાગે અનેક ઘા ઝીંકવામાં આવ્યા, જેના કારણે શફીકનું ઘટનાસ્થળે જ કરૂણ મૃત્યુ થયું.
હુમલાખોરો મૃતદેહને ત્યાં જ છોડીને ભાગી ગયા હતા, જ્યારે ગભરાયેલા અને આઘાતમાં સરી પડેલા બાળકો રડી રહ્યા હતા. સ્થાનિક લોકોએ તાત્કાલિક પોલીસને આ અંગે જાણ કરી.
હત્યાના ૬ કલાકમાં જ ૩ મુખ્ય આરોપીઓની ધરપકડ : આ ઘટના શહેરના સૌથી વ્યસ્ત વિસ્તારોમાંના એક, રેલ્વે સ્ટેશનના ફૂટઓવર બ્રિજ નીચે બની હતી. પોલીસે તુરંત કાર્યવાહી કરીને મૃતદેહને પોસ્ટમોર્ટમ માટે મોકલ્યો અને બાળકોને સુરક્ષિત જગ્યાએ ખસેડ્યા.
હત્યાના માત્ર છ કલાકની અંદર, પોલીસે ત્રણ મુખ્ય શંકાસ્પદોની ધરપકડ કરી છે. જેમાં મુજીબ ડોન નામનો સ્થાનિક અંડરવર્લ્ડનો કુખ્યાત વ્યક્તિ સામેલ છે, જેની સામે ધાકધમકી, હુમલો અને ગેરકાયદેસર હથિયારો રાખવા સહિતના અનેક ગુનાહિત કેસ પહેલેથી જ નોંધાયેલા છે. મુજીબનો ભાઈ સદ્દામ હુસૈન મોઈનુદ્દીન, અને સાળો શેખ ઈરફાન શેખ સુલેમાન પણ પોલીસ કસ્ટડીમાં છે.
વિવાદનું મૂળ : ગેરકાયદે ગેસ સિલિન્ડરનો ધંધોઃ પોલીસની પ્રાથમિક તપાસમાં બહાર આવ્યું છે કે આ લોહીયાળ હત્યાકાંડનું મુખ્ય કારણ ગેરકાયદેસર ગેસ સિલિન્ડરના વેપાર અંગેનો લાંબા સમયથી ચાલતો વિવાદ હોઈ શકે છે. મૃતક શફીક પણ આ જ વ્યવસાયમાં સંકળાયેલો હતો અને બંને પક્ષો વચ્ચે ધંધાકીય અદાવત હતી. પોલીસે બાકીના ફરાર શંકાસ્પદોને પણ ટૂંક સમયમાં પકડી પાડવાનો વિશ્વાસ વ્યક્ત કર્યો છે. (૩૭.૪)
(3:51 PM IST)
છેલ્લા 8 દિવસમાં સૌથી લોકપ્રિય 
