નવી દિલ્હી:  અમેરિકાએ ભારત પર 50% સુધીના ટેરિફ લાદ્યા અને રશિયા પાસેથી તેલ ખરીદવા બદલ દંડ પણ લગાવ્યો, પરંતુ ભારતે આ આર્થિક યુદ્ધ સામે કોઈ ઉગ્ર પ્રતિક્રિયા આપી નહીં. હવે આ 'શાંતિપૂર્ણ પ્રતિસાદ'નું કારણ ભારતના સંરક્ષણ મંત્રી રાજનાથ સિંહએ જાહેર કર્યું છે. મોરોક્કોમાં ભારતીય સમુદાયને સંબોધતા તેમણે જણાવ્યું કે ભારતની શાંતિ પાછળનું કારણ તેની "વ્યાપક દ્રષ્ટિ" છે.

રાજનાથ સિંહની 'વ્યાપક દ્રષ્ટિ'ની ફિલસૂફી
રાજનાથ સિંહે કહ્યું કે, "અમે પ્રતિક્રિયા આપતા નથી... મોટા વિચારો અને મોટા હૃદયવાળા લોકો કોઈપણ બાબતમાં તાત્કાલિક પ્રતિક્રિયા આપતા નથી." તેમના આ નિવેદનથી સ્પષ્ટ થાય છે કે ભારતે અમેરિકાના આર્થિક દબાણ સામે ધીરજ અને સમજદારીથી કામ લીધું છે.

ખેડૂતો અને માછીમારોનું હિત સર્વોપરી
અગાઉ, ઓગસ્ટ મહિનામાં કેન્દ્રીય કૃષિ મંત્રી શિવરાજ સિંહ ચૌહાણે પણ આ મુદ્દે ભારતનું વલણ સ્પષ્ટ કર્યું હતું. તેમણે કહ્યું હતું કે અમેરિકા ભારત પર પોતાના કૃષિ ઉત્પાદનોની આયાત માટે દબાણ કરી રહ્યું છે, પરંતુ ભારત રાષ્ટ્રીય હિત સાથે કોઈ સમાધાન કરશે નહીં. ચૌહાણે ભારપૂર્વક કહ્યું કે, "તેઓ (અમેરિકા) વિચારતા હતા કે આપણે ડરી જઈશું. પરંતુ આ આજનું ભારત છે, જે આત્મવિશ્વાસથી ભરેલું છે."

તેમણે કહ્યું કે અમેરિકા જીએમ (જેનેટિકલી મોડિફાઇડ) બીજ અને સબસિડીનો ઉપયોગ કરીને ખેતી કરે છે, જેની સામે ભારતના નાના ખેડૂતો સ્પર્ધા કરી શકતા નથી. તેથી, ભારત પોતાના ખેડૂતો અને માછીમારોના હિતનું રક્ષણ કરવા માટે પ્રતિબદ્ધ છે.

આ ઘટના પર તમારું શું મંતવ્ય છે? શું રાજનાથ સિંહનું વલણ ભારત માટે યોગ્ય છે?